Մսավաճառները չեն հետևում սանիտարահիգիենիկ պայմաններին

Սննդամթերքի անվտանգության պետական ծառայության Երևանյան կենտրոնի աշխատակիցները հուլիսի 24-ից ստուգումներ են անցկացնում մսամթերքի շուկայում՝ առկա բացթողումները բացահայտելու և դրանք կանխարգելելու նպատակով: Ստուգայցերը տեղի են ունենում ոչ միայն Երևանում, այլ նաև մարզային բնակավայրերի առևտրի կենտրոններում:

Ծառայության մասնագետները մսամթերքի որակի վերահսկողության նպատակով երեկ՝ օգոստոսի 6-ին, երկու խմբով շրջել են Գյումրու վաճառեկետերով: Ըստ մասնագետների հաղորդած տվյալների, լուրջ խախտումներ չեն հայտնաբերվել, սակայն ամեն ինչ իդեալական էլ չէր: Ծառայության աշխատակիցները հայտնել են, որ սանիտարահիգիենիկ պայմանների հետ կապված թերություններ կան, որոնք հանձնարարվել է վերացնել: Մասնագետների առաջին կանգառը Գյումրու շուկայի «Լաչինի միջանցք» կոչվող հատվածն էր, որտեղ մսի վաճառքի մի քանի կետեր կան: Ստուգողների խորհուրդը մսավաճառներին հետևյալն էր՝ ամառվա այս շոգ օրերին միսը հարկավոր է պահել սառնարաններում, իսկ գնորդներին հիշեցրել են, որ դրսում դրված միսը վտանգավոր է առողջության համար: Մսի վաճառակետերը ևս պետք է հատուկ սանիտարահիգիենիկ պայմաններով ապահովված լինեն, ինչը Գյումրիում լրջագույն խնդիր է: Մասնագետները մսավաճառներից պահանջում էին անասնաբույժի կողմից տրամադրված արտոնագիր, որը փաստում է, որ վաճառվող մսամթերքը հատուկ ստուգում է անցել:

Գյումրիի շուկայի անասնաբույժ Լևոն Գևորգյանը նշել է, որ շուկա մտնոս միսը օրվա մեջ մի քանի անգամ ստուգվում է, ուստի բացառվում են որակի հետ կապված խնդիրները: Չնայած անասնաբույժի խոսքերին, Ծառայության մասնագետները հայտնաբերել են, որ մսի վաճառքի որոշ կետեր նույնիսկ մսի իրացման թույլտվության վկայական չունեն: Մսավաճառը պարտավոր է ունենալ անասնաբուժական 5-րդ ձևը կոչվող տեղեկանք, որը բոլորի մոտ բացակայում է: Մասնագետները նշել են, որ մսավաճառներից շատերը նույնիսկ չգիտեն, որ պետք նման վկայական ունենան: Շուկայի անասնաբույժը ասել է, որ նման պահանջները շատ խիստ են, քանի որ մսամթերքի վաճառքն այնքան էլ լավ չէ, և մսավաճառներն այնքան շահույթ չեն ստանում, որպեսզի կարողանան վաճառակետի պայմանները բավարարել սեփական միջոցներով, այսինքն, սանիտարական պայմաններին հետևում են այնքանով, որքանով ի վիճակի են:

Ծառայության մասնագետները մսավաճառներին զգուշացրել են, որ հայտնաբերված թերություններն անհրաժեշտ է վերացնել, քանի որ հաճախակի են լինելու նման ստուգումները:

Չնայած նման ստուգումներին, մեր երկրում մսամթերքի շուկան այսօր բարձիթողի վիճակում է, քանի որ դժվար թե նման զգուշացումներից հետո մսավաճառները հետևեն սանիտարահիգիենիկ պայմաններին: Ամեն օր կարելի է ականատես լինել թե՛ Երևանի և թե՛ մարզերի շուկաներում վաճառվող մսի կետերի հակահիգիենիկ վիճակին: Մոտ ժամանակներում դժվար թե հաջողվի վերահսկողություն իրականացնել մսի վաճառքի կետերի նկատմամբ: Հենց գնորդն առաջինը պետք է մտածի՝ որտեղից է ձեռք բերում մսամթերքը, հատկապես՝ ամռանը, և երևի թե հենց սպառողների՝ մսամթերքի ձեռքբերման համար անհրաժեշտ տեղեկացվածությունը հնարավորություն կտա, որպեսզի մսավաճառները հասկանան և փորձեն վերացնել այդ թերությունները: