Ոսկու առևտրով զբաղվողները բողոքում են

Մինչև 2012թ.-ի ավարտը, ըստ մասնագետների, ոսկու 1 ունցիան կհատի 2,000 ԱՄՆ դոլարի սահմանագիծը: Այս տարվա առաջին կիսամյակում ոսկու գինն իջել է՝ կապված համաշխարհային տնտեսական աճի դանդաղման և դոլարի արժևորման հետ: Դրանով հանդերձ, այս պահին հայկական շուկայում 1 գրամ ոսկին վաճառվում է 31-35 (585 հարգը), 45 (750 հարգը), իսկ ամենաբարձր՝ 957 հարգի ոսկին 52-58 ԱՄՆ դոլարին համարժեք դրամով: Ձուլակտորի գրամը գնահատվում է 49-50 ԱՄՆ դոլար:

«Վաղարշ և որդիներ» ՍՊԸ-ին պատկանող բաղնիքի ոսկու շուկայի 22 տարվա վաճառող Հարություն Հարությունյանն ասել է.-«Եթե 10 տարի առաջ Հայաստանում ոսկու գրամն արժեր 5 դոլար, ապա այսօր այն գերազանցել է 31 դոլարը:Ենթադրվում է, որ միջազգային շուկայի թելադրանքով այն կհասնի մինչև 40 դոլարի: Միջազգային գինը շատ արագ անդրադառնում է տեղական շուկայի վրա: Եղել է դեպք, երբ 1 ունցիայի հաշվով օրվա ընթացքում ոսկու գնի տատանումը հասել է 30-40 դոլարի»: Հ. Հարությունյանը վստահեցնում է, որ վաճառողները ոսկու յուրաքանչյուր 1 գրամի վաճառքից շահել են ընդամենը 1 ԱՄՆ դոլար:

Ոսկու շուկայի՝ հիմնականում վնասով աշխատող աշխատակիցները պնդում են, որ նեղվում են հարկային և մաքսային վարչարարությունից: Նրանց խոսքով՝ այդ ոլորտը կարգավորող օրենսդրական բաց կա, և սպառողների շահերն աչքաթող են արված: Ոսկու վաճառքով զբաղվող Հ. Հարությունյան նշել է, որ մեր երկրում մաքսային քաղաքականությունը սահմանափակում է ոսկու ազատ արտահանումը, որի պատճառով հանրապետությունում փողի շրջանառություն չի լինում:

Չնայած ոլորտի վերահսկիչների առկայությանը՝ կեղծ ոսկեղենի շրջանառությունն այսօր էլ մնում է գերխնդիր, որը հեղինակազրկում է հայկական ոսկու բարի համբավը և մի քանի զեղծարարների պատճառով անվստահություն է ստեղծում տեղական արտադրանքի նկատմամբ:

ՀՀ էկոնոմիկայի նախարարությունից այս առթիվ մեկնաբանել են, որ դեռևս 6 ամիս առաջ ստեղծվել է շուկայի վերահսկողության պետական տեսչություն, որը զբաղվում է ոչ պարենային ապրանքների ուսումնասիրությամբ: Նշել են նաև, որ ոսկու շուկան ամբողջությամբ վերահսկվելու է, առաջիկայում սկսվելու են մանրակրկիտ ստուգումները: Դեռևս խախտումներ չեն գրանցվել, սակայն հայտնաբերելու դեպքում խախտողները կենթարկվեն վարչական տուգանքի:

Ոսկու առևտրով զբաղվողները պնդում են, որ առևտրի ամենալավ սեզոնը ամառն է, երբ «դրսից գալիս են աղջիկ ուզելու»: Բիզնես տեսակետից վաճառողն օրը հաջող է համարում, երբ միջին հաշվով ունենում է 10 գնորդ, իսկ «մեռած սեզոնին» 2-ից 3 կտոր ոսկայ զարդ վաճառելն արդեն հաջողություն է: