Այս տարի գյուղատնտեսության ոլորտում դրական տեղաշարժ է արձանագրվել

Հանրապետության գյուղատնտեսության ոլորտում 2012 թվականի առաջին կիսամյակում նկատելի են էական դրական տեղաշարժեր։

Ըստ ՀՀ գյուղատնտեսության նախարարության օպերատիվ տվյալների, հանրապետությունում գրանցվել է ցանքատարածությունների ավելացում, այն կազմել է շուրջ 312 հազ. հա՝ նախորդ տարվա 286.7 հազ. հա-ի դիմաց: Արդյունքում վարելահողերի նպատակային օգտագործման մակարդակը 2012թ.-ի հասել է 69.5 %-ի՝ նախորդ տարվա 63.8 %-ի դիմաց: Ընթացիկ տարում, 2011 թ-ի համեմատ, ցանքատարածությունները գերազանցում են 25.3 հազ. հա-ով, այդ թվում ավել է ցանվել 22.0 հազ. հա հացահատիկային մշակաբույս, 2.8 հազ. հա կարտոֆիլ և այլն:

ՀՀ ազգային վիճակագրական ծառայության տվյալներով, ընթացիկ տարվա առաջին կիսամյակում արտադրված գյուղատնտեսական արտադրանքի արժեքը կազմել է 203.6 մլրդ դրամ, որը գերազանցում է նախորդ տարվա նույն ժամանակահատվածի ցուցանիշը 8.1 %-ով: Գյուղատնտեսության ոլորտում աճը ապահովվել է ինչպես բուսաբուծության, այնպես էլ անասնապահության արատադրանքի ավելացման հաշվին: Սակայն բուսաբուծության ճյուղում աճը առավել ակնհայտ է, այն կազմել է 28.4 %:Դա հիմնականում կապված է գյուղատնտեսությունում հայտնի սեզոնայնության երևույթի հետ: 

Անասնաբուծությունում համախառն արտադրանքի ծավալները գերազանցել են նախորդ տարվա ցուցանիշը շուրջ 1.2 %-ով: Ընթացիկ տարում, տարբեր գործոններով պայմանավորված (ձնածածկի ուշ գոյանալու հետևանքով աշնանացան հացահատիկային մշակաբույսերի ցրտահարման երևույթներ, սակավաջրություն և այլն), հացահատիկային մշակաբույսերի բերքատվության մակարդակը ցածր է նախորդ տարվա ցուցանիշից, սակայն շուրջ 22.0 հազ. հա-ով ցանքատարածությունների ավելացման արդյունքում հանրապետությունում սպասվում է հացահատիկային և հատիկաընդեղենային մշակաբույսերի համախառն արտադրանքի որոշակի աճ:

2012թ.-ի առաջին կիսամյակում կարտոֆիլի հավաքված բերքը կազմել է 18.3 հազ. տոննա, որը գերազանցել է նախորդ տարվա մակարդակը 10.2 տոկոսով, բանջարեղենի բերքը կազմել է 40.5 հազ. տոննա՝ գերազանցելով նախորդ տարվա նույն ժամնակաշրջանի ցուցանիշը 17.1%-ով, բոստանային մշակաբուսերինը 2.5 հազ. տոննա, որը գերազանցում է նախորդ տարվա ցուցանիշը 4 անգամ:

Կիսամյակի արդյունքներով լավագույն ցուցանիշներ է գրանցվել պտղի արտադրության բնագավառում՝ հավաքվել է շուրջ 58 հազ. տոննա պտուղ, որը գերազանցում է նախորդ տարվա նույն ժամանակահատվածի ծավալները ավելի քան 1.9 անգամ: Խոտի կուտակման կիսամյակային ծավալները (119.8 հազ. տոննա) շուրջ 0.7 տոկոսով զիջել են 2011 թվականի համապատասխան ցուցանիշին:

Ընթացիկ օպերատիվ տվյալները վկայում են, որ տարվա արդյունքներով հանրապետության բուսաբուծության ճյուղում կապահովվի համախառն արտադրանքի զգալի ավելացում: Կիսամյակի արդյունքները շոշափելի աճ են կանխատեսում նաև անասնապահական հիմնական մթերքների՝ կաթի, մսի, ձվի արտադրության տարեկան ցուցանիշների համար:

Գների նվազում է արձանագրվել բուսաբուծական հիմնական մթերքների գծով: Այսպես, ըստ ՀՀ Ազգային վիճակագրական ծառայության տվյալների՝ գների ինդեքսը 2012թ. հունիսին 2011թ. հունիսի նկատմամբ մրգերի համար կազմել է 77.6 %, այդ թվում՝ խնձորինը՝ 42.9%, ծիրանինը' 51.1%, բալինը՝ 59.7% և այլն: Նշված ժամանակահատվածում բանջարեղենի և կարտոֆիլի ամփոփ ինդեքսը կազմել է 75.3%, այդ թվում' կաղամբը՝ 65.9%, լոլիկը՝ 120.4%, վարունգը' 68.1%, գլուխ սոխը՝ 92.4%, կանաչ լոբին՝ 53.9%, կարտոֆիլը՝ 55.9% և այլն: