Գյուղատնտեսական կենդանիների և թռչունների մոտ տուբերկուլյոզի կանխարգելման քայլեր են արվում

2012 թվականին ՀՀ մարզերում «Գյուղատնտեսական կենդանիների պատվաստում» ծրագրի շրջանակներում պետական պատվերով կատարվում են գյուղատնտեսական կենդանիների և թռչունների ախտորոշիչ հետազոտություններ, պատվաստումներ և մշակումներ, մասնավորապես՝ խոշոր եղջերավոր կենդանիների տուբերկուլյոզի ախտորոշիչ հետազոտություններ:

Տուբերկուլյոզը (Tuberculosis) գյուղատնտեսական և վայրի մի շարք կենդանական տեսակների, մուշտակատու գազանների և թռչունների քրոնիկ ընթացքով ինֆեկցիոն հիվանդություն է, որը բնորոշվում է տարբեր օրգաններում արյան անոթներից զուրկ յուրահատուկ հանգույցների՝ տուբերկուլների առաջացումով՝ հակված լինելով լոռանման քայքայման և ախտահարված հյուսվածքների կրայնացման: Այն թոքախտի ձևով բժիշկներին հայտնի է եղել շատ հին ժամանակներից. մարդկանց մոտ հիվանդության կլինիկական նշանները նկարագրվել են դեռևս Ք.ա. 4-րդ դարում՝ Հիպոկրատի կողմից: Այսօր հիվանդությունը տարածում ունի աշխարհի բազմաթիվ երկրներում: Այն մեծ տարածում է գտել նաև Հայաստանի Հանրապետությունում:

Ընտանի և վայրի կենդանիների շատ տեսակներ ընկալունակ են այդ հիվանդության նկատմամբ: Առավել բարձր ընկալունակությամբ են օժտված խոշոր եղջերավոր անասունները, խոզերը, ջրաքիսները և հավերը: Ծանր ձևով հիվանդանում է նաև մարդը:

Տուբերկուլյոզով հիվանդ կենդանիներին չեն բուժում, ենթարկում են սպանդի և մսեղիքն օգտագործում են անասնաբուժասանիտարական մշակումից հետո: