Հայրենական պատերազմի 100 վետերան հանգստյան ուղեգրեր կստանա

Այսօր կառավարության նիստում ընդունվել է 2012թ.-ի պետական բյուջեում վերաբաշխում կատարելու, պետական բյուջեից ՀՀ աշխատանքային և սոցիալական նախարարությանը, Հայրենական մեծ պատերազմի վետերանների հանգստի կազմակերպման նպատակով, գումար տրամադրելու հայեցակարգը:

2012 թվականի մայիսի 30-ին կայացած՝ Հայրենական մեծ պատերազմի վետերանների միության 10-րդ արտահերթ համագումարի ժամանակ քննարկման առարկան վետերաններին առողջարանային և հանգստյան տան ուղեգրեր տրամադրման հետ կապված հարցերն են եղել, որի կապակցությամբ վետերանները բազմիցս դիմել են նախարարություն:

Հաշվի առնելով Հայրենական մեծ պատերազմի վետերանների վաստակը, նրանց մեծ մասի պատկառելի տարիքը և իրենց հուզող առողջության պահպանման ու վերականգման առաջնայնությունը՝ ընթացիկ տարում ձեռք է բերվելու առողջարանի 100 ուղեգիր (առանց բուժման), որը կունենա ինչպես սոցիալական, այնպես էլ բարոյական նշանակություն:

Սույն որոշման նախագծի մշակման գործընթացում ներգրավվել են Հայաստանի Հանրապետության աշխատանքի և սոցիալական հարցերի նախարարության աշխատակազմի հաշմանդամների և տարեցների հիմնահարցերի, ֆինանսատնտեսագիտական և հաշվապահական հաշվառման վարչությունների համապատասխան մասնագետները:

ՀՀ կառավարության որոշումով ՀՀ 2012 թվականի պետական բյուրեի 11 բաժին, 01 խումբ, 01 դաս «ՀՀ կառավարության պահուստային ֆոնդ» ծրագրով Հայաստանի Հանրապետության աշխատանքի և սոցիալական հարցերի նախարարությանը հատկացվելու է համապատասխան դրամական միջոցներ:

2012 թվականին Հայրենական մեծ պատերազմի ձեռք բերվող առողջարանի 100 ուղեգրի համար անհրաժեշտ է 12,000.0 հազար դրամ:

Վերը նշված պահանջվող գումարի հարցը լուծվել ՀՀ 2012 թ.-ի պետական բյուջեով նախատեսված և ՀՀ աշխատանքի և սոցիալական հարցերի նախարարության միջոցով ֆինանսավորվող «Ընտանեկան նպաստ» ծրագրի համար նախատեսված միջոցների տնտեսումների հաշվին:

Կառավարության այդ որոշման շնորհիվ ապահովվում է Հայրենական մեծ պատերազմի շուրջ 100 վետերանների առողջության պահպանման ու վերականգման հարցերը: