Բոլոր գյուղնախարարները պետք է պատասխանատվության ենթարկվեին. Սարգիս Սեդրակյան

Այսօր «Ֆերմային շարժում» հասարակական կազմակերպության նախագահ Սարգիս Սեդրակյանը, չնայած գյուղատնտեսության վերաբերյալ նախարարության հաղորդած դրական կարծիքի, լրագրողների հետ հանդիպմանը նշել է, որ գյուղատնտեսության վիճակը ՀՀ-ում շատ վատ վիճակում է, քանի որ գյուղացին միշտ դժգոհում է, իսկ գյուղը գնալով դատարկվում է:

Ս. Սեդրակյանը, մասնավորապես, ասել է. «Գյուղատնտեսության նախարարությունն ամեն օր ասում է, թե ամեն ինչ լավ է, ամեն ինչ կարգին է, սակայն պատկերը բոլորովին այլ է. ամեն ինչ շատ վատ է: Գյուղերը ամեն օր դատարկվում են, գյուղացին աղքատ է, և ամեն ինչ գնում է անապատացման ու կա հետընթաց: Այստեղ ոչ մի լավ բան չկա»:

Վերջինս կարծիք է հայտնել, թե ՀՀ գյուղատնտեսության բոլոր նախարարներին պետք է պատասխանատվության ենթարկել, սակայն նրանք պաշտոնավարելուց հետո ստանձնում են նոր պաշտոններ։ «1994 թվականից սկսած մենք նորմալ գյուղնախարար չենք ունեցել, հողերի մեծ մասը չի մշակվում, վերանում է գյուղատնտեսությունը: Եթե մենք ապրեինք նորմալ երկրում, ապա բոլոր գյուղնախարարները պետք է պատասխանատվության ենթարկվեին, սակայն նրանք գալիս պաշտոնավարում են ու անցնում այլ պաշտոնների»:

Նա նշել է նաև, որ առաջիկայում սպասվող մարտահրավերներին դիմակայելու համար պետք է գյուղատնտեսության զարգացման ուղղությամբ պետական մոտեցում ցուցաբերվի: «Ամբողջ աշխարհում սպասվում են լուրջ մարտահրավերներ, որոնց դիմակայելու համար անհրաժեշտ է պետական մոտեցում, պետք է պարենային ապրանքների տնտեսում լինի, մինչդեռ անտերության է մատնված ամեն ինչ»: