Կառավարությունը կքննարկի վետերանների սոցիալ-իրավական պաշտպանության նախագիծը

Օգոստոսի 16-ին ՀՀ կառավարության քննարկմանն է դրվելու «Հայրենական մեծ պատերազմի վետերանների մասին» օրենքում փոփոխություններ և լրացումներ կատարելու նախագիծը, որի կարևորությունը բխում է Հայրենական մեծ պատերազմի վետերանների սոցիալ-իրավական պաշտպանության հարցերը լուծելու և ազգային օրենսդրությանն ու  ԱՊՀ միջպետական համաձայնագրերի պահանջներին համապատասխանեցնելու անհրաժեշտությունից:

Նախագծի ընդունման անհրաժեշտությունը պայմանավորված է նաև վետերանների բազմաթիվ դիմում-բողոքներին լուծում տալու հանգամանքով:

ՀՀ-ում Հայրենական մեծ պատերազմի վետերանների իրավական և սոցիալական պաշտպանության հարցերը կանոնակարգվում են «Հայրենական մեծ պատերազմի վետերանների մասին» ՀՀ օրենքով: Համաձայն նշված օրենքի 2-րդ հոդվածի՝ Հայրենական մեծ պատերազմի վետերան են համարվում Հայաստանի Հանրապետության այն քաղաքացիներն ու Հայաստանի Հանրապետությունում մշտապես բնակվող այն անձինք, ովքեր մասնակցել են Հայրենական մեծ պատերազմին, ինչպես նաև պատերազմի տարիներին Լենինգրադի բլոկադայի մասնակիցները և ֆաշիստական համակենտրոնացման ճամբարների նախկին անչափահաս գերիները:

Նախագծի նպատակներից է նաև վերը նշված բոլոր անձանց կարգավիճակները հստակեցնելն ու նրանց սոցիալական և իրավական պաշտպանության հարցերը մեկ իրավական ակտում ամրագրելը։ 

Համաձայն գործող օրենսդրության, Հայրենական մեծ պատերազմի վետերաններն օգտվում են՝

• Մասնակիցները՝ 8000 դրամ, իսկ հաշմանդամ վետերանները՝ 18000-27000 դրամ (ս.թ. սեպտեմբերի 1-ից)՝ կախված հաշմանդամության խմբից, ամենամսյա դրամական օգնություն ստանալու իրավունքից՝ նախկինում ունեցած տրանսպորտային անվճար սպասարկման, էլէկտրաէներգիայի, գազի, ջերմամատակարարման, ջրամատակարարման և ջրահեռացման վարձավճարների 50 տոկոս զեղչի դիմաց

• Հաշմանդամ վետերանները՝ աղբահանության, հեռախոսի եւ ռադիոյի բաժանորդային վարձը 50 տոկոս զեղչով վճարելու իրավունքից

• ԱՊՀ երկրների տարածքում տարին մեկ անգամ (կտրոնով, երկկողմանի կարգով) արտոնյալ պայմաններով երթևեկելու իրավունքից

• Պետպատվերի շրջանակում անվճար բուժօգնություն,այդ թվում՝ դեղորայք, պրոթեզաօրթոպեդիկ եւ վերականգնողական պարագաներ ստանալու իրավունքից

• 25000 դրամ ամենամսյա պատվովճար ստանալու իրավունքից (ս.թ.սեպտեմբերի 1-ից)

Բացի այդ, Հայրենական մեծ պատերազմի հաղթանակի 65-ամյակի կապակցությամբ ՀՀ կառավարության որոշմամբ Հայրենական մեծ պատերազմի վետերաններին տրվել է նաև քաղաքային տրանսպորտից անվճար երթևեկելու արտոնություն:

Նախագծի ընդունման արդյունքում նախկին ՆԳ մարմինների շարքային եւ սպայական կազմի աշխատակիցների թվից նրանք, ովքեր հաշմանդամ են դարձել ծառայողական պարտականություններ կատարելիս, կհամարվեն ՀՄՊ վետերան և կստանան ամենամսյա պատվովճար (մյուս արտոնություններից այսօր էլ են օգտվում), ինչը մասամբ կբարելավի նրանց սոցիալական վիճակը: Այդ անձանց թիվը Հայաստանի Հանրապետությունում 20-ն է: