ՀՀ փոխվարչապետը մարզպետների հետ քննարկել է 2012թ.-ի գյուղատնտեսական ցուցանիշները

ՀՀ փոխվարչապետ, տարածքային կառավարման նախարար Արմեն Գևորգյանի մոտ մարզպետների մասնակցությամբ երեկ տեղի է ունեցել խորհրդակցություն, որի ընթացքում ընթացքում ներկայացվել են համայնքների սեփական եկամուտների հավաքագրման 2012թ.-ի առաջին 7 ամիսների ցուցանիշները: Սեփական եկամուտների կատարողականը կազմել է 83,7%:

Ա. Գևորգյանը հանձնարարել է մարզպետներին՝ ուշադրության կենտրոնում պահել հավաքագրումների գործընթացը և ցուցանիշների բարելավմանն ուղղված աշխատանքներ տանել հատկապես ընթացիկ բյուջեների ցածր կատարողական գրանցած համայնքներում:
Քննարկվել են մարզերի առաջնահերթ խնդիրների լուծման հրատապ ծրագրի ընթացքին վերաբերող հարցեր: Զեկուցվել է, որ բոլոր մարզերում աշխատանքները կատարվում են համաձայն ժամանակացույցի, ծրագրի երկրորդ փուլի կատարողականը կազմում է 95 %, երրորդինը, որը սկսվել է ս.թ. հուլիս ամսին՝ 20 տոկոս: Մարզպետներին հանձնարարվել է հետևել շինաշխատանքների որակին և դրանց՝ սահմանված ժամկետներում իրականացմանը:

Խորհրդակցության ընթացքում անդրադարձ է կատարվել Ջերմուկում կայանալիք Գյուղական համայնքների երկրորդ համաժողովի նախապատրաստական աշխատանքներին: Հաշվի առնելով առաջին համաժողովի դրական փորձը՝ այն այս տարի ևս կանցկացվի նույն ձևաչափով. Կձևավորվեն աշխատանքային խմբեր, որտեղ կկազմակերպվեն թեմատիկ քննարկումներ: Համաժողովը կանցկացվի այս տարվա հոկտեմբերի 5-6-ը:

Մարզպետների հետ քննարկվել է նաև մարզերում էլեկտրոնային հաշվետվությունների համակարգի ներդրման նպատակով ուսուցողական դասընթացների կազմակերպման հարցը: Հանձնարարվել է աշխատանքներ տանել համապատասխան պետական կառույցների տարածքային ղեկավարների հետ՝ մինչեւ օգոստոսի վերջը ծրագրի մեկնարկի նախապատրաստական աշխատանքների ժամանակացույցը հաստատելու, ինչպես նաև պատասխանատու անձանց ընտրելու ուղղությամբ:

Ներկայացվել է «Համայնքային կառավարման տեղեկատվական համակարգ» ծրագրի ներդրման ընթացքը: Ընդհանուր առմամբ՝ ծրագիրը ներդրվել է 200 համայնքում: Համայնքներում աշխատանքների արդյունավետ և թափանցիկ կազմակերպման առումով փոխվարչապետը կարևորել է ծրագրի ներդրումը և կիրառումը մարզերում:

Խորհրդակցության ժամանակ քննարկվել են ոռոգման կազմակերպմանը վերաբերող խնդիրներ: Մասնավորապես, նշվել է, որ պայմանավորված եղանակային և սակավաջրության պայմաններով՝ շարունակում է բարձր մնալ ոռոգման ջրի պահանջարկը, հատկապես մեծ է բարձր ջրապահանջ ունեցող հատվածներում պահանջվող ջրաքանակի մատակարարման անհրաժեշտությունը:

Հաշվի առնելով ոռոգման ջրի մատակարարման կարևորությունը նաև աշնան գյուղատնտեսական աշխատանքների ժամանակ՝ փոխվարչապետը մարզպետներին հորդորել է համապատասխան աշխատանքներ տանել համայնքների ղեկավարների և գյուղացիական տնտեսությունների հետ, հետևել, որպեսզի ոռոգումն իրականացվի առավելագույնս կազմակերպված, և ջուրը մատակարարվի խնայողաբար՝ ընդգծելով, որ Սևանից սահմանված 320 մլն խմ ջրաքանակից ջրառն արդեն 230 մլն խմ է կազմում:

Մարզպետներին ներկայացվել է նաև «Հայջրմուղկոյուղի», «Լոռիջրմուղկոյուղի», «Շիրակջրմուղկոյուղի» եւ «Նոր Ակունք» ՓԲ ընկերությունների ներդրումային ծրագրերի ընթացքը:

Փոխվարչապետը նաև մարզպետների հետ քննարկել է բուժհաստատություններում ֆինանսական հոսքերի և պետպատվերով բուժօգնության կազմակերպման հետ կապված հարցեր՝ հատկապես անթույլատրելի համարելով պարտքերի կուտակումը ՀԲ-ի «Առողջապահական համակարգի արդիականացում» ծրագրով վերանորոգված բուժհաստատություններում, որտեղ բոլոր պայմաններն առկա են աշխատանքներն արդյունավետ կազմակերպելու համար։