Մարտունու ոստիկանները բացահայտել են թմրանյութի օգտագործման և իրացման դեպք (տեսանյութ)

Ոստիկանությունը շարունակում է թմրանյութերի անօրինական շրջանառության և օգտագործման դեմ հետևողական պայքարը:

Մարտի 23-ին ոստիկանության Մարտունու բաժնի ծառայողները բացահայտեցին հերթական դեպքը:
Ժամը 5.30-ի սահմաններում քրեական հետախույզները Մարտունի-Վարդենիս ճանապարհին, ապօրինի թմրանյութ պահելու, օգտագործելու և իրացնելու կասկածանքով, կանգնեցրել էին ԼՂՀ Թաղավարդ գյուղի 30-ամյա բնակչի «Նիսան» մակնիշի մեքենան: Ոստիկաններին նկատելով` Ստեփանակերտ քաղաքի 31-ամյա ուղևորը մեքենայի պատուհանից նետել էր թղթի մեջ փաթեթավորված չորացված և մանրացված կանեփանման դեղնականաչավուն զանգված, ինչը իրավապահներն արձանագրել և վերցրել էին:

Կասկածյալները, մեքենայով հանդերձ, բերման ենթարկվեցին ոստիկանության Մարտունու բաժին:

Ըստ ստեփանակերտցու` բուսական զանգվածն իրենն է, նախորդ տարի աշնանն է քաղել Ստեփանակերտ քաղաքի «Հոռին տակ» կոչվող տարածքում իր ցանած, մշակած կանեփի բույսից՝ անձնական օգտագործման համար: Նյութերի նախապատրաստման ընթացքում պարզվել է, որ նա մարտի 23-ին, ժամը 4-ի սահմաններում, Մարտունի քաղաքի ավտոկայանի մոտ թմրանյութը, այսպես ասած` հյուրասիրել է «Նիսանի» վարորդ, 30-ամյա ընկերոջը:
Հանգամանքները պարզվում են:

Նշանակվել է դատաքիմիական փորձաքննություն:
Փաստի առթիվ նախապատրաստվում են նյութեր: