Հայկական երկաթուղին սկսել է արդյունավետ աշխատել

Ըստ ՀՀ տրանսպորտի եւ կապի նախարարության տվյալների, դեռեւս 2008 թվականի փետրվարի 13-ին «Ռուսական երկաթուղիներ» ԲԲԸ-ի եւ Հայաստանի Հանրապետության միջեւ կնքված կոնցենսիոն պայմանագրով, «Հայկական երկաթուղի» ՓԲԸ-ն 30 տարի ժամանակով կառավարման հանձնվեց «Հարավկովկասյան երկաթուղի» ՓԲԸ-ին: Այս մասին հայտնում է «Ասպարեզ»–ը։

Պայմանագրի համաձայն, Հայկական երկաթուղու 4300 աշխատողների աշխատավարձերը, բացի թոշակի տարիքի հասած անձանցից, բարձրացվելու է 20 տոկոսով: Ռուսական կողմը 572 միլիոն դոլար ներդրում է իրականացնելու հայկական երկաթուղու ենթակառուցվածքի արդիականացմանը, Հայաստանին սահմանակից պետությունների հետ հաղորդակցության, ներհանրապետական եւ միջազգային ուղեւորատար եւ բեռնափոխադրումային երթուղիների իրականացման զարգացմանը:

«Հարավկովկասյան երկաթուղի» ՓԲԸ Գյումրու մասնաճյուղի տնօրեն Վահան Գասպարյանը նշում է, որ մինչ պայմանագրային կառավարման հանձնվելը, հայկական երկաթուղին ներդրումների մեծ կարիք ուներ:

-Ես ինքս, որպես այս ոլորտի հին աշխատող, կողմ էի, որ այն պայմանագրային կառավարման հանձնվեր, որպեսզի ներդրումներ իրականացվեին եւ երկաթգիծը նորմալ աշխատեր: Մենք ունեինք հնացած շարժակազմեր, չօգտագործվող գծային մասեր, շատ վատ վիճակում գտնվող էլէկտրոգնացքներ: Վերջին երեք տարիների ընթացքում՝ արդեն ունենք հարմարավետ գնացքներ:

Վահան Գասպարյանի հավաստմամբ, «Հարավկովկասյան երկաթուղու» 7-8 գծային հատվածներում գնացքների արագությունը հասել է 100 կմ/ժամ արագության: Ընթացքում գծային վերանորոգումներ են իրականացվել: Շատ են երթեւեկողները Երեւան-Բաթումի գնացքով: ԽՍՀՄ տարիների համեմատ, ուղեւորափոխադրումների թվի աճ է արձանագրվել: Երեւան-Բաթումի երթուղին օրական 500-600 ուղեւոր է փոխադրում:

-Ուղեւորները նաեւ էլեկտրոգնացքներից են օգտվում: Առաջ ունեինք մի գնացք՝ Գյումրի-Երեւանը, այսօր՝ երկուսն են,-ասաց Վ.Գասպարյանը:

Երկաթուղային բեռնափոխադրումների հետ կապված, Վ.Գասպարյանը պարզաբանում արեց, թե բեռնատար գնացքներով հիմնականում վառելանյութ, շինանյութ եւ հացահատիկ է փոխադրվում:

Ինչ վերաբերում է Գյումրի-Արթիկ-Պեմզաշեն էլեկտրոգնացքին, այն արդեն մի տարուց ավել չի գործում, քանի որ այդ երթուղին առավել մոտ էր Գյումրի քաղաքին եւ այստեղից ավտոբուսային արագ փոխադրումներ էին իրականացվում: