Այսուհետ ՀԿ-ները պետությանը ներկայացնելու են իրենց գործունեության մասին հաշվետվություն. պատգամավոր

ԱԺ «Իմ քայլը» խմբակցության պատգամավոր Մարիա Կարապետյանը ֆեյսբուքյան իր էջում գրառում է կատարել՝ նշելով, որ հետայսու հասարակական կազմակերպությունները պետությանը ներկայացնելու են իրենց գործունեության մասին հաշվետվություն, որը կհրապարակվի Պետական եկամուտների կոմիտեի կայքում։ Գրառումն ամբողջությամբ՝ ստորև․

«Հետայսու հասարակական կազմակերպությունները պետությանը ներկայացնելու են իրենց գործունեության մասին հաշվետվություն, որը կհրապարակվի Պետական եկամուտների կոմիտեի կայքում։

Անհրաժեշտ է ընդգծել, որ այս հաշվետվությունը կազմակերպությունների հարկային մարմին ներկայացվող հաշվետվությունը չէ։ Վերջինս շարունակում է պաշտպանվել հարկային գաղտնիքով և հասանելի է միայն Հարկային ծառայության համար։

Այս հաշվետվությունը այսպես ասած բովանդակային հաշվետվություն է։ Այսինքն պահանջվող տվյալներից ամենակենտրոնականը կազմակերպությունների կողմից տարվա ընթացքում իրականացված ծրագրերի անվանումները և դրանց համառոտ նկարագրությունն (վայր, նպատակ, կարգավիճակ) է, ստացված և ծախսված ընդհանուր գումարը։

Հույս ունեմ, որ սա հնարավորություն կլինի, որ նախ բոլոր հետաքրքրված քաղաքացիները ծանոթանան հասարակական կազմակերպությունների աշխատանքների հետ։ Հույս ունեմ նաև, որ սրա արդյունքում քաղաքացիները իրենց ուղղված սուտ և վախեր սնող հոսքը (իմա՝ «նրանք ծախված են և ծառայում են օտար շահերի») կհանդիպի սառը անտարբերության կամ բարի ժպիտի, քանի որ նման հաշվետվողականության դիմաց մենք՝ որպես հանրություն քաղաքացիական հասարակությանը հետյասու՝ ընդմիշտ պետք է ապահովենք օրենքով երաշխավորված և հարձակումներից զերծ գործունեություն՝ անկախ բոլորիս ճաշակից»։