Հացի թանկացումը սպառողների համար չի կարող դժվարություններ ստեղծել. Վարդան Բոստանջյան

Վերջերս Հայաստանում հացի և ալյուրի գնի բարձրացում է նկատվում, սակայն դա սապռողների համար չի կարող դժվարությունների հանգեցնել: Այդ մասին ասել է տնտեսագետ, ԲՀԿ անդամ Վարդան Բոստանջյանը, մեկնաբանելով, որ ցորենը միջազգային շուկայում հունիսի համեմատ աճել է 17%-ով:

«Կարծում, որ դա այնպիսի խոշոր թանկացում չէ, որ սպառողների համար դժվարություններ առաջացնի: Որոշակի թանկացումներ հիմնական պարենային ապրանքների կտրվածքով կլինեն: Բայց ամեն դեպքում չեմ կարծում, որ դրանք անտանելի  լինեն  սպառողների համար»,- նշել է Վ. Բոստանջյանը:

Պատասխանելով այն հարցին, թե, այնուամենայնիվ, միտումներ կան, որ գնաճը կշարունակվի, տնտեսագետը նշել է, որ գյուղատնտեսական մթերքների գների առումով գնաճ չի լինելու, քանի որ, ըստ Վ. Բոստանջյանի, այն կապված է տեղական գյուղմթերքների աճի հետ, որի պայմաններում գները ավելի զուսպ են: «Այստեղ փոխհատուցումներ կլինեն որոշ ապրանքատեսակների կտրվածքով, որոնք, ըստ էության, Հայաստանը չի արտադրում: Հետևաբար՝ ներկրվող ապրանքների գների բարձրացումը կփոխհատուցվի տեղական գյուղմթերքների գների անկմամբ: Եվ սպառողների համար մեծ դժվարություններ չեն լինի»:

Ավելի վաղ ՄԱԿ-ի Պարենի կազմակերպությունը (FAO) հայտարարել է,թե ցորենի եւ շաքարի համաշխարհային գները կտրուկ աճել են հուլիսի ընթացքում: Գնաճի հիմնական պատճառը ԱՄՆ-ում եւ Ռուսաստանում երաշտն է, որի պատճառով զգալի վանասներ են հասցվել թե՛ ռուսական և թե՛ ամերիկյան գյուղատնտեսությանը, ինչն էլ իր հերթին նպաստել է ցորենի համաշխարհային գների բարձրացմանը:

Հուլիսին ամբողջ աշխարհում սննդամթերքը թանկացել է 6%: