Վերանորոգվում է Դիլիջան տանող ճանապարհը

Հայաստանի Հանրապետության տրանսպորտի եւ կապի նախարար Գագիկ Բեգլարյանն օգոստոսի 15-ին աշխատանքային այցով մեկնել է Տավուշի մարզ, որտեղ նրան դիմավորել է Տավուշի մարզպետ Արմեն Ղուլարյանը: Նախարարը ծանոթացել է Մ-4 միջպետական ավտոճանապարհի 86-րդ կմ-ի հատվածում կատարվող շինարարական աշխատանքներին:

Ճանապարհը սկսվում է Դիլիջանի թունելից եւ ձգվում մինչեւ քաղաքի կենտրոն: 2003թ-ին այն վերականգնվել էր «Լինսի» հիմնադրամի միջոցներով: Սակայն, ինտեսիվ երթեւեկության, բարդ լեռնային ռելիեֆի պայմաններում ճանապարհային հագուստը մաշվել էր` առաջացնելով անթույլատրելի չափերի նստվածքներ, փոսեր, եւ անհրաժեշտություն էր առաջացել հիմնանորոգում կատարելու: 2012թ-ին Դիլիջանի բնակչության հետ հանդիպմանը ՀՀ նախագահ Սերժ Սարգսյանը խոստացել էր լուծել հիմնախնդիրը: Նախագահը ՀՀ տրանսպորտի եւ կապի նախարարությանը հանձնարարել է ուսումնասիրել հարցը եւ ներկայացնել առաջարկություններ: Նախարար Գագիկ Բեգլարյանի նախաձեռնությամբ, նախարարության կողմից կնքված պայմանագրի համաձայն՝ օգոստոսի 2-ից սկսվել է 12.8 կմ երկարությամբ հատվածի հիմնանորոգումը: Շինարարական աշխատանքներն իրականացնում է «Խաչհար» եւ «Իջեւանի ՃՇՇ» ՓԲԸ ձեռնարկությունների կոնսորցիումը: Աշխատանքները սկսվել են լայն թափով և ամբողջությամբ կավարտվեն նախանշված ժամկետից մեկ ամիս շուտ' սեպտեմբերին: Գագիկ Բեգլարյանը ծանոթացել է կատարվող շինարարական աշխատանքներին եւ իր գոհունակությունը հայտնել ճանապարհի որոշակի հատվածում կատարված ասֆալտապատման աշխատանքների որակի առնչությամբ:

«Մեզ համար կարեւորը ճանապարհի բարձր որակն է եւ դրա պահպանումը: Շինարարարական աշխատանքների հիմքում գլխավորն այն է, որ նորոգումից հետո նվազագույնը յոթ տարի ճանապարհները որեւէ խնդիր չունենան»,- նշել է նախարարը: Գագիկ Բեգլարյանը շինարարներին տվել է համապատասխան հանձնարարականներ:

Ճանապարհի աշխատանքների կատարման համար պետբյուջեից հատկացվել է 1 միլիարդ 170 միլիոն դրամ: Դիլիջանի ճանապարհաշինարարական աշխատանքներին ծանոթանալուց հետո նախարար Գագիկ Բեգլարյանն այցելել է Վանաձոր-Ալավերդի-Վրաստանի սահման Մ-6 ավտոճանապարհի 82-րդ կմ-ի հատված՝ ծանոթանալու սողանքի հետեւանքով փլուզված հատվածի վերականգնողական աշխատանքների ավարտին: Նախարարը ներկա է գտնվել փլուզման վայրում կառուցված 2011թ-ի հոկտեմբերի 2-ի զոհերի հիշատակին նվիրված հուշարձան- աղբյուրի բացմանը: Զոհվածների հարազատներն ու հյուրերը ծաղիկներ են դրել հուշարձանին եւ մեկ րոպե լռությամբ հարգել զոհերի հիշատակը:

«Հատուկ շնորհակալության են արժանի Արտակարգ իրավիճակների նախարարության, մարզպետարանի աշխատակիցները, փրկարարները, գյուղապետերը, ովքեր միահամուռ կերպով կարողացան այս ճանապարհը վերականգնել: Նրանք մի մարդու պես աշխատել են, փրկել են շատ կյանքեր, սակայն, ցավոք, չկարողացան փրկել հինգ մարդու կյանք: Բնության դեմ պայքարելը դժվար է, սակայն նախարարությունն անելու է հնարավորը՝ հետագայում նման վթարներից խուսափելու համար»,-ասել է նախարարը: Բեգլարյանը վստահեցրել է, որ ճանապարհի վերակառուցված հատվածը բավականին հուսալի է:

Հիշեցնենք, որ 2011թ-ի հոկտեմբերի 2-ին՝ ժամը 19:00-ի սահմաններում, Մ-6՝ Վանաձոր-Ալավերդի-Վրաստան միջպետական ավտոճանապարհի 82-րդ կմ-ին տեղի էր ունեցել խոշոր սողանք, որի հետեւանքով հողային զանգվածը սահել էր ճանապարհի վրա՝ մայրուղին դարձնելով երթեւեկության համար անանցանելի Տավուշի մարզի Նոյեմբերյանի տարածաշրջանի Լճկաձոր եւ Այրում բնակավայրերի հատվածում: Փլվածքի հատվածը կազմել է 360 մետր: Բնական աղետի այս գոտին առաջին իսկ պահից հայտնվել է կառավարության առաջնային ուշադրության կենտրոնում: ՀՀ ՏԿՆ-ն անհապաղ միջոցներ է ձեռնարկել երթեւեկությունը ժամանակավոր սխեմայով կազմակերպելու համար: Լճկաձոր եւ Այրում գյուղերի տարածքով կառուցվել էր շրջանցիկ ճանապարհ, որով կազմակերպվել էր մարդատար մեքենաների երթեւեկությունը, իսկ բեռնատարներինն ամբողջությամբ տեղափոխվել էր Նոյեմբերյան-Իջեւան-Դիլիջան ճանապարհի վրա: Նախարարությունը 2012թ-ի պետբյուջեի միջոցների տնտեսման հաշվին կատարել է փլուզման հատվածի երկրաբանական հետազոտությունները եւ մշակել վերակագնման աշխատանքների նախագծանախահաշվային փաստաթղթերը: 2012թ-ի առաջին եռամսյակում անցկացվել է շինարարարական աշխատանքների գնման մրցույթ, որի հաղթող է ճանաչվել «Ճանապարհ» ՍՊԸ-ն՝ 550 միլիոն դրամ պայմանագրային արժեքով: ՀՀ կառավարության որոշմամբ՝ ՀՀ տրանսպորտի եւ կապի նախարարության 2012թ-ի պետբյուջեի միջոցների տնտեսած գումարների հաշվին համապատասխան ֆինանսավորում է հատկացվել վերը նշված աշխատանքների իրականացման համար: Արդյունքում վերականգնվել է նախկին մայրուղին: Կատարվել է ճանապարհի մաքրում հողե զանգվածից, որի ծավալը կազմում է 245 հազար խմ, ճանապարհային պատվածքի կառուցում, որի մակերեսը կազմում է 2 հազար 920 քմ: Տեղադրվել են երթեւեկության անվտանգության ապահովման անհրաժեշտ մետաղական արգելափակոցներ եւ նշաններ: Բոլոր աշխատանքներն ավարտվել են հուլիսի 26-ին: Տվյալ հատվածում երթեւեկությունն ամբողջովին վերականգնված է:

Նախարար Բեգլարյանը օգոստոսի 15-ին այցելել է նաեւ Ապարան քաղաք: Մ-3 միջպետական ճանապարհը՝ Երեւան-Ապարան-Վանաձոր, նախկինում նորոգվել է 2000 թ-ի սկզբներին: Ապարանի ներսում՝ այդ ճանապարհի շուրջ 3.9 կմ երկարությամբ հատվածն ամբողջովին քայքայվել է, որի հիմնական պատճառը վատ ջրահեռացումն է ոչ միայն անձրեւաջրերից, այլեւ խմելու եւ կոյուղու ջրերից: Ապարանի ազգաբնակչության հետ հանդիպմանը ՀՀ նախագահ Սերժ Սարգսյանը, արձագանքելով բնակչության խնդրանքին, հանձնարարել է նախարարությանը' ուսումնասիրել ու լուծել խնդիրը: Օգոստոսի 2-ին նախարարության հետ կնքված պայմանագրի շրջանակներում «Շինֆորում» կապալառու կազմակերպությունն արդեն սկսել է վերանորոգման աշխատանքները, որոնք կավարտվեն մինչեւ տարեվերջ:

Ճանապարհի շինարարական աշխատանքների համար պետբյուջեից հատկացվել է 550 միլիոն դրամ: Գագիկ Բեգլարյանն իր դժգոհությունն է հայտնել շինարարներին աշխատանքների դանդաղ ընթացքի կապակցությամբ: Նա հանձնարարել է արագացնել ճանապարհի կառուցապատման եւ ասֆալտապատման աշխատանքները եւ հստակ խնդիր դրել նրանց առջեւ ապահովել ճանապարհի կառուցման բարձր որակը, որոնց արդյունքը ստուգելու համար օգոստոսի 25-ին եւս կայցելի Ապարան: