Ռուսաստանը կալանավորել է «Արմավիա»-ի ինքնաթիռը

«Արմավիա» ավիաընկերության՝ SSJ ինքնաթիռներից հրաժարման հետ կապված սկանդալը նոր ընթացք է ստացել: SSJ ինքնաթիռների վաճառող «Гражданские самолеты Сухого» (ГСС) ՓԲԸ-ն «Արմավիա» ընկերությանը մեղադրել է պայմանագրի կետերին չհետևելլու մեջ և Ռուսաստանի տարածքում կալանավորել է ընկերության օդանավը: ГСС-ը չի բացառում հետագայում դատարանին դիմելու փաստը, որպեսզի ստիպի «Արմավիային»՝ մարելու պարտքերը, բացի այդ հնարավոր է՝ մինչև պարտքի մարումը նոր ինքնաթիռներ կալանավորվեն: «Արմավիա»-ի նկատմամբ բողոք է ներկայացրել նաև Внешэкономбанк-ը, որը հանկարծ հիշել է 2010թ.-ին մատուցված ծառայությունների դիմաց կուտակված պարտքերի մասին:

ГСС-ի ֆինանսների գծով փոխնախագահ Եվգենի Կոնկովը հայտնել է, որ «Արմավիա»-ն չի կատարել SSJ ինքնաթիռների պայմանագրի պայմանները, որը պետք է կատարեր մինչև օգոստոսի 15-ը: «Արմավիա»-ն, հրաժարվելով արդեն օգտագործվող և նոր պատվիրվող ինքնաթիռներից, պարտավոր է վճարել պայմանագրով նախատեսված 4 մլն. ԱՄՆ դոլարը կամ էլ պետք է ձեռք բերի պայմանագրով նախատեսված երկրորդ ինքնաթիռը: «Արմավիա»-ն չի կատարել այդ երկու պայմաններից և ոչ մեկը, որի հետևանքով SSJ «Արմավիա»-ի օդանավը, որը վերանորոգման նպատակով գտնվում էր Ռուսաստանի Դաշնության տարածքում, կալանավորվել է և ավիաընկերությանը չի վերադարձվելու: Այժմ այն գտնվում է Ժուկովի օդանավակայանում:

Եվգենի կոնկովը նշել է, որ «Արմավիա»-ի՝ ինքնաթիռներից հրաժարվելը իրավաբանական դժվարություններ կստեղծի, քանի որ ընկերությունն արդեն մի քանի անգամ գրավադրել է տվյալ ինքնաթիռը: Չնայած Կոնկովը հրաժարվել է նշել բանկերի անունները, որտեղ գրավադրվել է ինքնաթիռը, սակայն Коммерсант-ի՝ իրավիճակին քաջածանոթ աղբյուրները հայտնել են, որ այդ բանկերից մեկը Արդշինինվեստբանկն է: Բացի այդ, SSJ ինքնաթիռը «Արմավիա»-ի կողմից 3.5 մլն. ԱՄՆ դոլարով ձեռքբերված CRJ (Bombardier) ինքնաթիռների համար ծառայել է որպես գրավ: