2012-ի երկրորդ եռամսյակում ՀՀ-ում գործազրկությունը կազմել է 18.9%

2012թ.-ի առաջին կիսամյակում աշխատուժի շուկայի զարգացումները, ընդհանուր առմամբ, համահունչ են եղել տնտեսությունում արձանագրված տեմպերին, որի արդյունքում աշխատանքի շուկայում էական անհավասարակշռություններ չեն նկատվել:

Ըստ ՀՀ ԿԲ-ի գնահատումների՝ 2012-ի երկրորդ եռամսյակում միջին անվանական աշխատավարձն ավելացել է 6.2%-ով՝ արտահայտելով մասնավոր հատվածում աշխատավարձերի աճը և բյուջետային ֆինանսավորում ունեցող որոշ կազմակերպություններում աշխատավարձերի չափավոր աճը, ինչի պարագայում աշխատավարձերի իրական աճը կազմել է 5.2%:

Մասնավոր հատվածում անվանական աշխատավարձերի աճի վրա էական ազդեցություն են ունեցել արդյունաբերության և ծառայությունների ճյուղերում արտադրողականության շարունակական աճը և տնտեսական աճին զուգընթաց աշխատուժի նկատմամբ պահանջարկի ավելացումը:

Աշխատուժի աճող պահանջարկի պայմաններում գործազրկության միջին եռամսյակային մակարդակը 2012-ի երկրորդ եռամսյակում, նախորդ տարվա նույն ժամանակաշրջանի համեմատ, նվազել է 2 տոկոսային կետով՝ կազմելով 18.9%:

Աշխատանքի շուկայի նշված զարգացումների պայմաններում տնտեսությունում էական անհավասարակշռություններ չեն նկատվել, մասնավորապես, իրական աշխատավարձի աճը համահունչ է եղել արտադրողականության աճին: Հետևաբար, կարելի է փաստել, որ 2012-ի երկրորդ եռամսյակում աշխատանքի շուկայի ազդեցությունը գնաճի վրա եղել է չեզոք: