2012թ.-ի երկրորդ կիսամյակում արձանագրվել է 3.1% գնանկում. ՀՀ ԿԲ

2012թ.-ի երկրորդ եռամսյակի փաստացի արդյունքներով գրանցվել է 3.1% գնանկում՝ նախորդ տարվա նույն ժամանակաշրջանի 1.6%-ի համեմատ, որի արդյունքում 12-ամսյա գնաճը շարունակել է նվազել և հունիսի վերջի դրությամբ կազմել է 0.7%: 

Դրամավարկային քաղաքականության երկրորդ եռամսյակի ծրագրի՝ բազային սցենարի նկատմամբ արձանագրված ցածր 12-ամսյա գնաճը պայմանավորվել է բացառապես պարենային ապրանքների գների անկմամբ, այն դեպքում, երբ ոչ պարենային ապրանքների գները և ծառայությունների սակագները, ինչպես և սպասվում էր, հիմնականում աճել են: 2010թ.-ի կեսերից սկսած, երբ դիտվել էր գյուղատնտեսության ճյուղի թողարկման ծավալների զգալի անկում, տեղական արտադրության գյուղմթերքների գների սեզոնային ավելի քիչ նվազման ազդեցությամբ ձևավորվել էին 12-ամսյա գնաճի բարձր մակարդակներ: Այնուհետև, անցած երկու տարվա ընթացքում գյուղատնտեսության ճյուղի զարգացման (2011թ.-ի տարեկան աճը՝ 13.7%, 2012թ.-ի առաջին կիսամյակի աճը՝ 9.5%) արդյունքում տեղական արտադրության գյուղմթերքների առաջարկած մեծ ծավալները հանգեցրել են դրանց գների շարունակական նվազման: Նշված գործոններով պայմանավորված՝ 12-ամսյա գնաճի ցածր մակարդակի ձևավորմանը առավելապես նպաստել է պարենային ապրանքների գների փոփոխությունը: Պարենային ապրանքների 12-ամսյա 0.9% գնանկմանը մեծապես նպաստել է «բանջարեղեն և կարտոֆիլ» ապրանքախմբի գների 21.4% անկումը: Ոչ պարենային ապրանքների և ծառայությունների գները համապատասխանաբար աճել են 3.9%-ով և 1.9%-ով:

2011թ.-ի դրամավարկային քաղաքականության ծրագրում կանխատեսվել էր գնաճային միջավայրի շարունակական մեղմացում և տարեվերջից 12-ամսյա գնաճի ձևավորում՝ նպատակային թիրախի տատանումների թույլատրելի միջակայքում: 2012թ.-ի դրամավարկային քաղաքականության ծրագրով նախատեսվել է, որ 12-ամսյա գնաճը կդրսևորի համեմատաբար կայուն վարքագիծ՝ ողջ տարվա ընթացքում պահպանվելով տատանումների միջակայքում:

2011թ.-ի տարեվերջին գրանցվել է 4.7% գնաճ: Նույնը չի կարելի ասել 2012թ.-ի առաջին կիսամյակի համար, քանի որ ակնկալվող կայուն վարքագծի փոխարեն 12-ամսյա գնաճը շարունակել է աստիճանաբար նվազել: Այսպես, 2012թ.-ի հունվար-հունիս ամիսներին գրանցվել է  0.7% գնաճ՝ գտնվելով տատանումների թույլատրելի միջակայքի ստորին սահմանից ցածր: Ձևավորված գնաճային ցածր միջավայրին նպաստել է բացառապես պարենային ապրանքների գների նվազումը (-0.5 տոկոսային կետ), որն ուղեկցվել է ոչ պարենային ապրանքների և ծառայությունների 0.6-ական տոկոսային կետ նվազումով:

Հաշվի առնելով գնաճային միջավայրի մեղմացման փաստացի միտումները և նախորդ տարվա համեմատությամբ գյուղմթերքների գների նվազման ակնկալիքները՝ ԿԲ խորհուրդը գնահատել էր, որ գնաճային միջավայրի կրկին ընդլայնման հավանականությունը բավականին ցածր է և ֆինանսական շուկայում ձևավորված տոկոսադրույքների միջոցով հնարավոր է առկա գնաճային միջավայրի զսպումը: Դրանից ելնելով՝ ՀՀ ԿԲ-ն հուլիս-օգոստոս ամիսներին անփոփոխ է թողել վերաֆինանսավորման տոկոսադրույքը, իսկ սեպտեմբերին իջեցրել է 0.5%-ով՝ սահմանելով 0.8% մակարդակ: Նույնիսկ 2012թ.-ի երկրորդ կիսամյակում ԿԲ-ն չի նվազեցրել վերաֆինանսավորման տոկոսադրույքը՝ պայմանավորված. առաջին` մայիս-հունիս ամիսների դրամի արժեզրկմամբ արդեն իսկ դրամավարկային պայմանների թուլացմամբ,  երկրորդ՝ 12-ամսյա բնականոն գնաճի` այդ ընթացքում մշտապես գնաճի նպատակային ցուցանիշի սահմաններում գտնվելով:

 Ըստ ՀՀ կենտրոնական բանկի տվյալների