Հայկական կոնյակի արտահանման ծավալներն ավելանում են

Հայկական կոնյակն արտահանման ամենամեծ ծավալներ ունեցող արտադրատեսակներից է, որի պահանջարկը միջազգային շուկայում բավականին մեծ է։ Դրա հետևանքով վերջին տարիներին կոնյակի արտադրության և արտահանման ծավալները զգալիորեն աճել են:

ՀՀ ազգային վիճակագրական ծառայությունը կոնյակի արտահանման ծավալները դիտարկում է օղու, ռոմի և ջինի ապրանքնախմբում: «Արմենպրես»-ի հետ զրույցում ԱՎԾ-ից հայտնել են, որ եթե 10 տարի առաջ Հայաստանից արտահանվել է ընդամենը 8,133 տոննա կոնյակ, օղի, ռոմ և ջին, ապա միայն այս տարվա առաջին կիսամյակում արտահանվել է 21,038 տոննա՝ 77.8 մլն. ԱՄՆ դոլար ընդհանուր արժեքով: Նախորդ տարի նույն ժամանակահատվածում արտահանվել է 12,271 տոննա, իսկ ողջ տարվա ընթացքում՝ 32,558 տոննա, որի ընդհանուր արժեքը կազմել է 131.2 մլն. դոլար:

Պետական եկամուտների կոմիտեի տվյալների համաձայն՝ հայկական կոնյակի արտադրության ծավալները 2011 թ.-ին կազմել են 14,482,644.3 լիտր, արտահանման ծավալները՝ 12,094,477.3 լիտր, երկրի ներսում իրացման ծավալները՝ 2,129,818.8 լիտր:

Կոնյակագործության ոլորտում Հայաստանում 2011 թ.-ին գործունեություն են իրականացրել 28 տնտեսվարող սուբյեկտներ, որոնց ընդհանուր արտադրանքի 22%-ն իրականացրել է «Երևանի կոնյակի գործարան» ՓԲԸ-ն, 20%-ը՝ «Պռոշյանի կոնյակի գործարան» ՍՊԸ-ն, իսկ 19.9%-ը՝ «Երևանի Արարատ կոնյակի-գինու-օղու կոմբինատ» ԲԲԸ-ն:

Հայկական կոնյակն ապահովում է ամբողջ աշխարհի կոնյակի շուկայի 2%-ը: Երևանի կոնյակի գործարանի արտադրության «Արարատ» կոնյակն իր ողջ տեսականիով՝ «Անի», «Ընտիր», «Ախթամար», «Տոնական» և «Նաիրի», շարունակում է մնալ Հայաստանի բրենդը համաշխարհային շուկայում: Հայկական կոնյակի սպառման ամենամեծ շուկան շարունակում է մնալ Ռուսաստանի Դաշնությունը, որին հաջորդում են Ուկրաինան և ապա միայն եվրոպական երկրները:

Նշենք նաև, որ չնայած կոնյակագործության և գինեգործության լավագույն ավանդույթներին՝ վիճակագրությունը փաստում է, որ Հայաստանում ալկոհոլային խմիչքներից ամենամեծ սպառումն ունի օղին, ապա գինին, հետո միայն կոնյակը: