Հայաստանի անհավասար մրցակցությունն անհանգստացնում է սիրիահայ գործարարներին

Սիրիայից Հայաստան տեղափոխված մեր հայրենակիցներին, որոնք ուզում են բիզնեսը տեղափոխել կամ սկսել հայրենիքում, պետական ոչ մի աջակցություն՝ հարկային արտոնություններ, վարկերի առաջնահերթ տրամադրում և այլն, առայժմ չկա:

Գործատուների հանրապետական միությունը տրամադրում է անվճար խորհրդատվություն՝ գործող հարկային-մաքսային օրենքների, տարածքների և կադրերի ընտրության, բիզնես գաղափարների իրականացման հարցերի շուրջ: «Առաջին լրատվական»-ի հետ զրույցում միության նախագահ Գագիկ Մակարյանը հայտնեց, որ շատ նախագծեր քննարկվում են, իսկ երեքն արդեն գործնական փուլ են մտել:

Նրա խոսքով՝ մեկը տարածք է գնել և շուտով կսկսի մեքենաների էլեկտրական մասերի վերանորոգում եվրոպական դետալներով: Մի սիրիահայ էլ գործարանների համար հոսքագծերի և սարքավորումների արտադրություն է ցանկանում հիմնել, որ կարող են արտադրամասեր կառուցել: Հայաստանում գործարանը նախատեսվում է բացել զուգահեռ Սիրիայում դեռ գործող մոտ 250 հոգանոց գործարանի: Այժմ նախատեսվում են գործարար հանդիպումներ՝ շուկայի պահանջարկը հասկանալու համար: Մի սիրիահայ էլ ջրամեկուսիչների արտադրություն է ուզում սկսել:

«Մյուսներին ընդհանուր խորհուրդներ ենք տվել: Ընդհանրապես, իրենք շատ համեստ մարդիկ են՝ շատ մշակութային, ազնիվ մտքերով, և երևում է, որ սրտանց ուզում են այստեղ հաստատվել: Մեկին նույնիսկ դրդել էին Վրաստան գնալ՝ ասելով, որ այնտեղ ավելի գրավիչ պայմաններ են բիզնես սկսելու համար, բայց ինքը գերադասել էր պատմական հայրենիքը, ինչը ողջունել ենք: Մարդկանց հաճախ վախեցնում են, որ ճնշումներ կան շատ, անհավասար մրցակցություն է, օրենքների կիրառությունը անհավասար է, ձեռքից բիզնեսը կխլեն և այլն: Իրենց շրջանում նման անհանգստություն կա»,- ասաց Գ.Մակարյանը:

1in.am