Լիլիթ Մակունցը՝ Ալեն Սիմոնյանի հետ տեղի ունեցած միջադեպերի մասին

Ալեն Սիմոնյանը զղջում է կատարվածի համար և նշում է, որ ստիպված է եղել այդպես արձագանքելու: Արձանագրեք, որ դեռ չենք լսել ներողություն սեռական բնույթի հայհոյանք հնչեցնողից։

Այս մասին այսօր լրագրողների հետ զրույցում ասացԼիլիթ Մակունցը՝ անդրադառնալով ԱԺ փոխնախագահ Ալեն Սիմոնյանի և «Լուսավոր Հայաստան» խմբակցության անդամների միջև ԱԺ նիստում հնչած վիրավորանքներին։

Դիտարկմանը, թե ինչու են դեպքերը հենց Ալեն Սիմոնյանի հետ տեղի ունենում, նախօրեին էլ Մարուքյանի հետ տեղի ունեցավ, Մակունցը նշեց. «Իրավական գնահատական չհայտնելով թե Ալեն Սիմոնյանի, թե մյուս կողմի գործողություններին, ուզում եմ ձեր ուշադրությունը հրավիրել ընդհանուր պատկերին, քանի որ ես սա որպես առանձին դեպք չեմ դիտարկում։ Իրականում փորձ է արվում այնպիսի տպավորություն ստեղծել, որ կարող է հանրային անվտանգության առումով խնդիր առաջանալ և տպավորություն է ստեղծվում, որ դա կարող է տեղի ունենալ ցանկացած քաղաքացու նկատմամբ կամ պաշտոնատար անձի նկատմամբ, ով հնչեցնում է տեսակետ, որը չի համընկնում կոնկրետ խմբի տեսակետին: Իմ անձնական կարծիքով` հատկապես վերջին օրենքներից մեկը, որն ընդունվեց ապօրինի գույքի ձեռք բերման կապակցությամբ և դրան հետևած Ալեն Սիմոնյանի հրապարակային ելույթները, կարծում եմ՝ անմիջականորեն կապված են տեղի ունեցած միջադեպերի հետ: Այս ամենի հետևում կանգնած են այն բոլոր մարդիկ, ովքեր ապօրինի գույք են ձեռք բերել, և ունեն որոշակի անհանգստություններ և այդ առնչությամբ Ալեն Սիմոնյանի հայտարարություններն իրենց դուր չեն եկել: Անուններ չեմ կարող հնչեցնել, դա կոնկրետ մարմինների պարտականությունն է»:

Մակունցը հավելեց՝ այնպես չէ, որ որևէ մեկն արդարացնում է որևէ բան, իրավական գործընթացներ են տեղի ունենում և գնահատականները կհրապարակեն իրավապահ մարմինները:

Լրագորղի հարցին, թե  ինչո՞վ է պայմանավորված իրենց խմբակցության տղամարդկանց նման վերաբերմունքը կին գործիչների նկատմամբ՝ հիշեցնելով, որ Անդրանիկ Քոչարյանը վիրավորական արտահայտություն էր արել նախկին պատգամավոր Արփինե Հովհաննիսյանի հասեցին, Կարեն Սարուխանյանը` Սոֆյա Հովսեփյանի, Ալեն Սիմոնյանն էլ Անի Սամսոնյանի, Մակունցը պատասխանեց․ «Մեր խմբակցությունում դեպքերը քննարկվում են և դրանից անում են հետևություններ և այն, որ Ալեն Սիմոնյանն արդեն ներողություն է խնդրել, փաստում է դա: Բայց մենք չենք լսել օրինակ սեռական բնույթի հայհոյանք հնչեցնողի կողմից ներողություն: Խնդրում եմ սա նույնպես արձանագրենք»: