Միքայել Մինասյանը ՀՀ տարածքում չի գտնվում․ Արթուր Դավթյան

Կարող է անել այդպիսի հրապարակումներ, սակայն իր տեղը հնարավոր չլինի հայտնաբերել, ունենք մեկ պաշտոնական տվյալ, որ Միքայել Մինասյանը ՀՀ-ի տարածքում չի գտնվում։

Այս մասին այսօր լրագրողների հետ զրույցում ասաց ՀՀ Գլխավոր դատախազ Արթուր Դավթյանն անդրադառնալով այն հարցին, թե Միքայել Մինասյանը ֆեյսբուքյան գրառումներ է անում, արդյոք հնարավոր չէ՞ նրան գտնելը։

«Բնականաբար նրա նկատմամբ հայտարարված հետախուզումը նաև միջազգային կոնվենցիոն կարգավորումների շրջանակներում պետք է իրացվի գործընկեր երկրների իրավապահ մարմինների կողմից»,-ասաց Դավթյանը։

Հարցին՝ վարչապետի խոսնակի հայտարարություններում արդյոք անմեղության կանխավարկածի խախտում կա՞ր, գլխավոր դատախազը պատասխանեց. «Անմեղության կանխավարկածի խախտման փաստի առկայության որոշողը դատարանն է։ Մենք քրեական վարույթում ունենք ոսկե կանոնը. անձը անմեղ է, քանի դեռ նրա մեղավորությունը հաստատված չէ օրինական ուժի մեջ մտած դատավճռով։ Սակայն ինքներս էլ ականատես ենք բազում անձանց կողմից նախնական իրենց դիտարկումների և տեղեկությունների հրապարակումների»։

Դիտարկմանը, թե նշված քրեական գործերում կա՞ն խոչընդոտներ, որոնք թույլ չեն տալիս պարզել իրականությունը, Արթուր Դավթյանը պատասխանեց. «Իմ ասած խոչընդոտ բառի իմաստն այն է, պատկերացնենք, որ հանցագործություն ես իրականացնում, պլանավորում և իրականացնում ես այնպես, որ հետևիցդ եկողն այդ հետքերը կտեսնի, դու փորձում ես այդ հետքերը թաքցնել կամ կորցնել։ Մեր պարտքն է՝ որքան էլ որ դա մտածված և կազմակերպված լինի, անենք այնպես, որ հնարավոր լինի այդ հետքերը բացել»։

Դավթյանը հավելեց, որ այս պահին չի կարող նշված քրեական գործերում առկա գումարների մասին խոսել. «Նախնական մեր օպերատիվ տվյալներով հարյուրավոր միլիոնավոր դոլարների մասին է»։