Արցախում վրանային հոսպիտալ և բուժսանիտարական կետ են բացազատվել

Նոր տիպի կորոնավիրուսային վարակի տարածման կանխարգելման միջոցառումների շրջանակներում ԱՀ պարետ Գրիգորի Մարտիրոսյանն այցելել է արտակարգ իրավիճակների պետական ծառայություն և ԱԻՊԾ տնօրեն, գեներալ-մայոր Վլադիկ Խաչատրյանի ուղեկցությամբ ծանոթացել բացօթյա պայմաններում վրանային հոսպիտալի և բուժսանիտարական կետի բացազատման ցուցադրական տարբերակին: Այս մասին վկայակոչելով  Արցախի Հանրապետության արտակարգ իրավիճակների պետական ծառայությանը, Ֆեյսբուքի իր էջում տեղեկացնում է Արցախ / Տեղեկատվական շտաբը։

ԱԻՊԾ նյութատեխնիկական բազայի ներգրավմամբ ցուցադրական բացազատումն, ըստ  Արցախ / Տեղեկատվական շտաբի, իրականացվել է հակահամաճարակային միջոցառումների շրջանակում՝ հնարավոր արտակարգ սցենարներին պատրաստ լինելու և անհրաժեշտության դեպքում համապատասխան աշխատանքներ ծավալելու նպատակով։

Աղբյուրը նշել է,  որ վրանային հոսպիտալում տեղավորվում են մինչև 12, իսկ բուժսանիտարական կետում՝ 2 մահճակալ, պահարաններ, սեղաններ և աթոռներ:

«Բացազատված վրանները ներկայացված քանակով չեն սահմանափակվում. ԱԻՊԾ նյութատեխնիկական բազայում առկա է լրացուցիչ միջոցների ներգրավման հնարավորություն»,- նշված է հաղորդագրությունում: