Գնանկում չունենք, ունենք գնաճ, բայց՝ համեստ. Վարդան Արամյան

ՀՀ ֆինանսների փոխնախարար Վարդան Արամյանն այսօր լրագրողների հետ հանդիպման ժամանակ կարևորեց այս տարվա հունվար-հուլիսին արձանագրված 7.7% տնտեսական ակտիվության ցուցանիշի որակական մասը, հատկապես՝ արդյունաբերության ու գյուղատնտեսության աճը:
«Գնանկում չունենք, ունենք գնաճ, բայց՝ համեստ: Օրինակ ծառայությունների գնաճ կա՝ 0,7 %: Կա գնաճ ոչ պարենային ապրանքների դեպքում: Պարենային ապրանքների դեպքում ունենք 1 % գնաճ»,- նշեց փոխնախարարը:
Ինչ վերաբերում է գործազրկության խնդրին, Վ. Արամյանի խոսքով՝ այն պետք է դիտարկել համեմատության աստիճանով՝ ինչ է կատարվում ամբողջ աշխարհում և Հայաստանում: «Նույն եվրոպական երկրներում նկատվում է գործազրկության աճ: Հայաստանում մինչև 2009 թ. գործազրկության աճ էր նկատվում, այդ աճը հիմա չկա»,- նշեց փոխնախարարը:
Ըստ նրա՝ աղքատության ցուցանիշը Հայաստանում երբեմն խեղաթյուրում են: Աղքատության փոփոխության համադրելի ցուցանիշը ոչ թե 12% է (23%-ից այս տարի դարձել է 35%), այլ մոտ 4-5%, քանի որ փոխվել է մեթոդաբանությունը: Փոխնախարարի խոսքով՝ իրական աղքատությունը 2008 թ. 23%-ից 2012 թ. դարձել է 27%: «Կուրծք ծեծելու բան չէ, թե մենք բոլոր հարցերը լուծել ենք, բայց խնդիրները լուծվել են այնքանով, որքանով թույլ են տվել բյուջեի հնարավորութունները: Մենք չենք կարող վարկ վերցնելով մարդկանց թոշակ կամ աշխատավարձ տալ: Դա ճիշտ չէ»,- նշեց Վ. Արամյանը: Ըստ նրա՝ խնդիրները բավականին շատ են, հակառակ դեպքում կառավարությունն անելիք չէր ունենա:
«Մարդկանց պահանջմունքն անընդհատ բարձրանում է, կառավարության հիմնական խնդիրն է այնպես անել, որ մարդկանց կենսամակարդակը տարեցտարի աճի: Իսկ դրա համար պետք է գործողություններ կատարել»,- եզրափակեց փոխնախարարը: