«Սպայկա»-ն շարունակում է խաբել գյուղացիներին

«Սպայկա» գյուղմթերք ընդունող ընկերությունը շարունակում է խաբել գյուղացիներին և ձգձգել նրանց հանձնած մթերքի դիմաց գումարների վճարումը: Գյուղացիները դեռևս օգոստոսի 23-ին բողոքի ակցիա էին կազմակերպել՝ այդկերպ խնդրելով կառավարությանն ուշադրության կենտրոնում պահել այս խնդիրը: Սակայն մինչ օրս ոչ մի փոփոխություն չի եղել, բացի «Սպայկա» ընկերության կողմից մի քանի զանգերի՝ պարտավորություն վերցնելով վճարումները կատարել մի քանի ժամվա ընթացքում: «Սպայկա» ընկերության աշխատակիցը խնդրել է գյուղացիներին համբերել ևս մի քանի ժամ, մինչ կկարողանան վարկ դասավորել և բաժանել գումարները: Սակայն, արդյունքում, զանգերն անարդյունավետ են եղել:

Գյուղացիները զգուշացնում են ընկերությանը, որ կդիմեն ծայրահեղ միջոցների: Նրանք պատրաստ են թեկուզ ամեն օր բողոքի ակցիաներ անցկացնել, փակել մայրուղին և ընդհանրապես այն ամենը, ինչը կարտահայտի իրենց բողոքը:

Հիշեցնենք, որ «Սպայկա» գյուղմթերք ընդունող ընկերությունը գյուղացիներից հավաքել է կեռաս, ծիրան, բալ և չի կատարել համապատասխան վճարումները։ Գումարը հասնում է 42.000.000 դրամի։

Գյուղացիները կառավարության շենքի մոտ կազմակերպել էին բողոքի ակցիա, որով պահանջում էին վերադաձնել իրենց գումարները: Նրանք կառավարությանը հանձնեցին դիմում-բողոք, որի տակ ստորագրել էր մոտ 150 բնակիչ։ Ըստ գյուղացիների տեղեկությունների՝ դիմում-բողոքն արդեն գյուղնախարարությունում է: