«Եկամտային հարկի մասին» ՀՀ նոր օրենքով աշխատավարձերի իջեցում չի ենթադրվում

Օգոստոսի 28-ին, ՀՀ կառավարության մամուլի կենտրոնում «Եկամտային հարկի մասին» ՀՀ օրենքի վերաբերյալ մամուլի ասուլիսով հանդես եկան ՀՀ աշխատանքի և սոցիալական հարցերի նախարար Արտեմ Ասատրյանն ու ֆինանսների նախարար Վաչե Գաբրիելյանը:

Ըստ բանախոսների՝ կենսաթոշակային բարեփոխումների շրջանակներում ընդունված «Եկամտային հարկի մասին» ՀՀ նոր օրենքն ուժի մեջ է մտնելու 2013 թվականի հունվարի մեկից, ինչով պայմանավորված՝ միավորվել են եկամտահարկը, պարտադիր սոցիալական ապահովության և անհատական սոցիալական ապահովության վճարներն ու դարձել մեկ՝ «Եկամտային հարկ»:

«Խնդիր է դրված օպտիմալացնել գործատուների հաշվետվությունները, որոնք բացառապես լինելու են էլեկտրոնային եղանակով: Դա նշանակում է, որ այսուհետ գործատուները պարտադրված չեն լինի այցելել հարկային մարմիններ»,- նշել է պարոն Ասատրյանը՝ պարզաբանելով նաև, որ «Եկամտային հարկի մասին» ՀՀ օրենքով աշխատավարձերի իջեցում չի ենթադրվում և աշխատողին վճարվող դրույքաչափային աշխատավարձի տնoրինվող եկամուտը 2013 թվականի հունվարին չպետք է պակաս լինի 2012 թվականին վճարված փաստացի աշխատավարձից:

Ինչպես հավաստեց ՀՀ ֆինանսների նախարար Վ. Գաբրիելյանը՝ «Եթե տեղի կունենա այդպիսի բան, ապա հարկային մարմինը կիրականացնի վերահսկողություն: Օրենքն այնպես է մշակվել, որպեսզի աշխատակիցների փաստացի իրական եկամուտները չպակասեն, 2013 թվականի հունվարին յուրաքանչյուր աշխատող չպետք է պակաս գումար ստանա, քան ստանում էր 2012 թվականի դեկտեմբերին»: