Սա քաղաքական հաշվեհարդարի յուրատեսակ ձև է. Արեգ Գևորգյան

Օգոստոսի 4-ին Հայ Ազգային կոնգրեսի երիտասարդներ Արեգ Գևորգյանը, Վահագն Գևորգյանը և Սահակ Մուրադյանը Հատուկ քննչական ծառայությունից (ՀՔԾ) ստացել են որոշում այն մասին, որ կարճվել է իրենց նկատմամբ հարուցված քրեական գործը՝ 2011-ի օգոստոսի 9-ի միջադեպի հետ կապված՝ ապացույցների բացակայության պատճառով:

Այդ կապակցությամբ փաստաբան Հովիկ Արսենյանը դիմել էր ՀՔԾ ՀԿԳ քննիչ Ա. Մինասյանին, այդ որոշումը չեղյալ համարելու համար, այսինքն Կոնգրեսի երեք երիտասարդների մասով քրեական գործի կարճման հիմքերն ապացույցների բացկայությունից վերափոխելու հանցակազմի բացակայության։ Այս մասին Լուրեր.com-ի հետ զրույցում ասաց Հայ ազգային կոնգրեսի ակտիվիստ Արեգ Գևորգյանը։

«Այսօր մենք ստացանք պատասխան, որ կարճման հիմքերը փոփոխելու բողոքը մերժվում է՝ անհիմն լինելու պատճառաբանությամբ. ստորագրված է ընդհանուր բնույթի հանցագործությունների գործերով վարչության պետի տեղակալ Մարտիրոսյանի կողմից։ Այստեղ իրավական առումով որևիցե տրամաբանություն չկա իրավապահ մարմինների, էս դեպքում՝ ՀՔԾ-ի գործողությունների մեջ։ Այստեղ ևս մեկ անգամ ակնհայտ է դառնում, որ սա քաղաքական որոշում է, և այստեղ կատարվում է քաղաքական պատվեր՝ հաշվի չառնելով իրավական հիմքերի առկայությունը կամ բացակայությունը։

Նույն դրվագով, նույն հիմքով չորս մարդ դատապարտվում է ազատազրկման, այսինքն համարվում է, որ նրանց մեղքը ապացուցված է, և միևնույն դրվագով, միևնույն ապացույցներով երեք մարդ արդարացվում է՝ ապացույցներ չլինելու պատճառաբանությամբ։ Սա մեզ մտորումների տեղիք է տալիս և ստիպում է մեզ ևս մեկ անգամ համոզվել, որ սա քաղաքական հաշվեհարդարի յուրատեսակ մի ձև է»,- ասաց Գևորգյանը։

Անդրադառնալով առաջիկա քայլերին` ՀԱԿ ակտիվիստը նշեց, որ ուժի մեջ են ուրբաթօրյա բողոքի միջոցառումները շարունակական բնույթ են կրելու. «Շուտով մենք պատրաստվում ենք դիմել Հայաստանում գործող բոլոր երկրների դեսպանություններին, որպեսզի արձագանքեն այս ապօրինություններին։ Վերաքնննիչ դատարան դիմումն արդեն ներկայացված է։ Դատական նիստերը նշանակվելուն պես մենք կմտնենք թե՜ իրավական, թե՜ փողոցային ակտիվության նոր փուլ»։

Հիշեցնենք, որ ՀԱԿ երիտասարդ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Դավիթ Քիրամիջյանի գործով, օգոստոսի 20-ին բողոք է ներկայացվել վերաքննիչ դատարան: Բողոքում միջնորդվել է բեկանել Երևանի Կենտրոն և Նորք-Մարաշ վարչական շրջանների դատարանի հուլիսի 20-ի դատավճիռը և կայացնել արդարացման դատավճիռ:

Հիշեցնենք, որ դատարանը՝ դատավոր Գագիկ Պողոսյանի նախագահությամբ ՀԱԿ երիտասարդների նկատմամբ կայացված դատավճռով նրանց դատապարտել է 2-ից 6 տարվա ազատազրկման: Դատարանի դատավճռով Տիգրան Առաքելյանը մեղավոր էր ճանաչվել իշխանության ներկայացուցչի նկատմամբ կյանքի կամ առողջության համար վտանգավոր և ոչ վտանգավոր բռնություն գործադրելու և խուլիգանության, իսկ Արտակ Կարապետյանը՝ իշխանության ներկայացուցչի նկատմամբ ոչ վտանգավոր բռնություն գործադրելու և խուլիգանության մեջ, Սարգիս Գևորգյանն ու Դավիթ Քիրամիջյանը՝ խուլիգանության մեջ:

Բոլոր 4 ամբաստանյալները մեղադրվում են 2011-ի օգոստոսի 9-ին ոստիկանների հետ տեղի ունեցած միջադեպի գործով։

Գայանե Համբարձումյան