Թեղուտի մթերքները կվաճառվեն առցանց

Ցանկացած տարածաշրջանում հանքերի բացման և հանքարդյունաբերության զարգացման համար անհրաժեշտ են հիմնավորումներ, որ այդ տարածքում տնտեսության այլ ճյուղերի զարգազումը անհնարին է կամ ոչ շահավետ: Հայաստանում այս պայմանը ոչ միայն չի կատարվում, այլ ընդհանրապես չի հիշատակվում դրա մասին: Օրեցօր, առանց որևէ հիմնավորումների, տրվում են հանքերի շահագործման լիցենզիաներ և սա այն դեպքում, որ մեր իշխանությունները խոսում են կայուն զարգացման քաղաքականության մասին: Մասնավորապես տնտեսական զարգացման քաղաքականության մեջ նշվում է.«Բարեփոխումների հետևողական իրագործումը բյուրեղանալու է այնպիսի ձեռքբերումներով, որոնցում երկարաժամկետ կայուն զարգացման հիմքերն ու համակարգային լուծումները գերակշռում են կարճաժամկետ և արագ արդյունքների նկատմամբ»: Ուղղակի ծիծախելի է խոսել երկարաժամկետ կայուն զարգացման մասին ու նման ծավալներով շահագործել ընդերքը՝ մեծամասշտաբ վնասներ հասցնելով բնությանը: Ու այս ամենը կատարվում է տեղի բնակչությանը այլընտրանքների հնարավորություններից զրկելով, հանքարդյունաբերությունը որպես ծանր սոցիալական վիճակի հաղթահարման և երկրի զարգացման միակ ուղի ներկայացնելով:

Թեղուտի պաշտպանության քաղաքացիական խումբը հանդես է եկել նախաձեռնությամբ, որով փորձ է արվելու Թեղուտի և շրջակա գյուղերի գյուղատնտեսական մթերքները իրացնել երևանյան շուկայում: Նախաձեռնության հեղինակների պնդմամբ սա փորձ է ցույց տալու, որ Թեղուտում հանքարդյունաբերությանը էական այլընտրանք է գյուղատնտեսությունը: Այս դեպքում խնդիր է միայն լայն շուկայի և մթերող ընկերությունների բացակայությունը, որի ապահովմամբ պետք է զբաղվեին մեր իշխանությունները՝ ամենուր հանքերի լիցենզիաներ տրամադրելու փոխարեն: Շուտով պատրաստ կլինի մթերքների իրացման համար նախատեսված ինտերնետային կայքը, որի միջոցով Երևանի բնակիչները կկարողանան առցանց պատվիրել գյուղատնտեսական մթերքներ: Կայքում լուսանկարներով ու գներով կներկայացվեն մթերքները, ինչպես նաև կլինեն տեղեկություններ մթերքն արտադրող գյուղացու ու նրա ընտանիքի մասին, ինչը հնարավորություն կտա ցանկության դեպքում անձամբ կապվել գյուղացու հետ և մեծաքանակ գնման մասին պայմանավորվել: Կանխատեսվում է, որ առցանց մթերքների գնման դեպքում գները կլինեն շուկայականից ցածր, քանի որ վերավաճառողներ չեն լինի:

Մինչ կայքի պատրաստման աշխատանքների ավարտը մթերքներ կարելի է պատվիրել «Փրկենք Թեղուտը» ֆեյսբուքյան խմբում: