Կվերականգնվի՞ արդյոք արտասահմանում գտնվող ՀՀ քաղաքացիների ընտրելու իրավունքը

Օգոստոսի 27-ին ՀՀ ԱԺ «Ժառանգություն» խմբակցության ղեկավար Ռուբեն Հակոբյանը խմբակցության անունից գրավոր դիմել է ՀՀ մարդու իրավունքների պաշտպանին՝ ՀՀ ընտրական օրենսգրքի 60-րդ հոդվածի սահմանադրականությունը ՀՀ սահմանադրական դատարանում վիճարկելու առաջարկով:

Այս մասին Lurer.com-ը զրուցեց ՄԻՊ գրասենյակի Իրավական վերլուծության վաչության պետի ժամանակավոր պաշտոնակատար Արամ Վարդևանյանի հետ, ով ուսումնասիրում է Ռուբեն Հակոբյանի կողմից ուղարկված նամակը։

«Իրականում առաջին հայացքից կա խնդիր։ Սահմանադրության 30-րդ հոդվածը նախատեսում է այն խումբ անձանց, ովքեր չեն կարող մասնակցել ընտրություններին, այսինքն՝ գործում է հստակ իմպերատիվ արգելք, սակայն Ընտրական օրենսգրքի 60-րդ հոդվածը նախատեսում է այն անձանց, ովքեր կարող են մասնակցել ընտրություններին ՀՀ տարածքից դուրս գտնվելու դեպքում։ Այսինքն՝ մյուս խումբ անձինք, ովքեր նշված չեն, իրենց իրավունքը, կարելի է ասել, առաջին հայացքից մեկնաբանվում է, որ չեն կարող մասնակցել ընտրություններին,-ասաց Արամ Վարդևանյանը և ավելացրեց,- այս խնդրի վերաբերյալ մենք դեռևս ցանկանում ենք ուսումնասիրել միջազգային փորձը և այն հիմնավորումները, որոնք օգտագործվել են  Ընտրական օրենսգրքի 60-րդ հոդվածն ընդունելիս, այսինքն՝ հոդվածի պատմությունը մինչև ուժի մեջ մտնելը և ԱԺ-ի կողմից ընդունվելը»։

Քննարկումից հետո եթե պարզվի՝  մարդկանց ընտրելու իրավունքն անհարկի սահմանափակվում է  և այդ սահմանափակումը չի համապատասխանում Սահմանադրությանը, ՄԻՊ-ը միանշանակ կդիմի Սահմանադրական դատարան, որպեսզի պարզվի ընտրական օրենսգրքի 60-րդ հոդվածի համապատասխանելիությունը Սահմանադրության 30-րդ հոդվածին։

Վերջինիս խոսքով ՝ «Աժ կանոնակարգ» ՀՀ օրենքի համաձայն՝ ՄԻՊ-ը 10-օրյա ժամկետում պետք է տեղեկացնի Ռուբեն Հակոբյանին, սակայն վերջնական արդյունքի գալը ՄԻՊ-ը կարող է ներկայացնել 30-օրյա ժամկետում։ «Մենք հնարավորինս արագ ենք փորձելու այս հարցի վերաբերյալ տրամադրել մեր վերջնական դիրքորոշումը։ Պաշտպանի ցուցումով փորձելու ենք հնարավորինս արագ արձագանքել այս դիմումին և տեսնել՝ արդյոք կարող ենք տվյալ դեպքում դիմել Սահմանադրական դատարան արդյունքի ակնկալիքով»,- նշեց Արամ Վարդևանյանը։

Նելլի Ավետիսյան