Քրեակատարողական հիմնարկի աշխատակիցը մեղադրվում է խարդախության մեջ

ՀՀ հատուկ քննչական ծառայությունում ավարտվել է ՀՀ ԱՆ «Վարդաշեն» քրեակատարողական հիմնարկի բուժսպասարկման բաժնի երրորդ կարգի մասնագետ Ն. Պետրոսյանի կողմից խարդախություն կատարելու դեպքի առթիվ հարուցված քրեական գործի նախաքննությունը: Քրեական գործով դատավարական ղեկավարում իրականացնող դատախազը հաստատել է մեղադրական եզրակացությունը:

Նախաքննությամբ ձեռք բերված ապացույցներով պարզվել է, որ Ն. Պետրոսյանը 2012 թվականի փետրվարի վերջին իր քրոջորդի Ա. Մանուկյանից իմանալով, որ վերջինիս ընկերը՝ 26-ամյա Գ. Հայրապետյանը, դեռևս անձնագրավորված եւ զինվորական հաշվառման վերցված չէ, ինչպես նաեւ այն, որ Գ. Հայրապետյանը եւ նրա մայրը՝ Խ. Հայրապետյանը, ժամկետային զինվորական ծառայությունից ազատվելու համար օրենքով սահմանված գումարը պատրաստ են վճարել, մտադրվել է խարդախությամբ տիրանալ նրանց դրամական միջոցներին:

Մասնավորապես՝ Ն. Պետրոսյանը 2012թ. փետրվարի վերջին մայր եւ որդի Հայրապետյանների հետ նախնական համաձայնության է եկել՝ 4500 ԱՄՆ դոլար վարձատրության դիմաց Գ. Հայրապետյանի անձնագրավորման ու զինծառայությունից ազատելու հարցերը լուծելու շուրջ եւ պահանջել է հնարավորինս արագ վճարել պայմանավորված գումարը:

Գ. եւ Խ. Հայրապետյանները, վաճառելով Մասիս քաղաքում գտնվող իրենց հողատարածքը, մարտի 12-ին, ապա նաեւ նույն ամսվա 27-ին իրենց բնակարանում Ն. Պետրոսյանին մաս-մաս տվել են ընդհանուր 4250 ԱՄՆ դոլար գումար: Խարդախությամբ հափշտակված 1.655.520 ՀՀ դրամին համարժեք 4250 ԱՄՆ դոլարը Ն. Պետրոսյանն օգտագործել է իր անձնական կարիքների համար:

Բացի այդ, 2012թ. ապրիլի կեսերին նույն անձանց խոշոր չափերով գույքը խարդախությամբ հափշտակելու դիտավորությամբ Ն. Պետրոսյանը կրկին գնացել է մայր եւ որդի Հայրապետյանների բնակարան եւ Խ. Հայրապետյանից պահանջել 2500 ԱՄՆ դոլար գումար՝ Գ. Հայրապետյանի փաստաթղթավորման գործով զբաղվողներին նվիրատվություն տալու պատճառաբանությամբ:

Ձեռք բերված ապացույցների հիման վրա Ն. Պետրոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով եւ 34- 178-րդ հոդվածի 2-րդ մասի 2-րդ կետով:

Քրեական գործն ուղարկվել է Երևան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով: