Ախթալայի միջադեպով հարուցվել է քրեական գործ

Նախօրեին Ախթալայում միջադեպի փաստով ՀՀ ոստիկանության Լոռու մարզի քննչական բաժնում քրեական գործ է հարուցվել ՀՀ քրեական օրենսգրքի 185-րդ հոդվածի 3-րդ մասի առաջին կետի հատկանիշներով (գույքը դիտավորությամբ ոչնչացնելը կամ վնասելը) նախաքննությունը շարունակվում է:

ՀՀ ոստիկանության հասարակայնության հետ կապի ու լրատվության վարչությունը տեղեկացնում է, որ օգոստոսի 30-ին, ժամը 18.30-ի սահմաններում, Ախթալա քաղաքի բնակիչ Արսեն Չիչյանը և Լոռու մարզի Շնող գյուղի բնակիչ Էդգար Հախվերդյանը հարձակվել են Կարեն Խաչիկյանին պատկանող Ախթալա քաղաքի Սպանդարյան փողոցի 52-րդ շենքի 10-րդ բնակարանի վրա: Նրանք կոտրել են մուտքի դուռը' ոչնչացնելով ու վնասելով տան գույքը, այնուհետև ոտքերով հարվածել ու վնասել են Կարեն Խաչիկյանի եղբոր' նշված շենքի բակում կայանված «Մերսեդես Բենս» մակնիշի ավտոմեքենան, ինչի հետևանքով պատճառել են առանձնապես խոշոր չափերի գույքային վնաս:

Նախաքննությամբ պարզվել է նաև, որ Կարեն Խաչիկյանը, գալով տուն, իմացել է կատարվածի մասին և հորեղբոր որդու' Վաչագան Խաչիկյանի հետ գնացել են Արսեն Չիչյանի' Ախթալա քաղաքի Աբովյան փողոցի 22 շենքի թիվ 2 բնակարանը, որտեղ դիտավորյալ վնասել և մասամբ ոչնչացրել են նրանց տան գույքը, ռետինե մահակով հարվածներ հասցրել տան անդամներ Բենիկ Չիչյանին, Բավական Չիչյանին և Նունե Խաչիկյանին:
Տուժողներին տրվել են դատաբժշկի ուղեգրեր: