ՀՀ նախագահի հանձնարարականները՝ վերամշակողներին

Սեպտեմբերի 1-ին Արմավիրի մարզում ՀՀ նախագահ Սերժ Սարգսյանը մասնակցեց «Նոյան» պտուղ-բանջարեղենի վերամշակման գործարանի բացմանը: Արարողությանը ներկա էին նաև ոլորտի և մարզի պատասխանատուներ, հյուրեր և լրագրողներ:

Բացման խոսքում ՀՀ գյուղատնտեսության նախարար Սերգո Կարապետյանը նշեց, որ կարճ ժամանակի ընթացքում գործարանի սեփականատիրոջ կողմից իրականացվել են հսկայածավալ աշխատանքներ: «Այսօր բոլորս ականատես ենք ժամանակակից, նորագույն տեխնոլոգիաներով հագեցած գործարանի բացմանը՝ ճիշտ ժամանակին և ճիշտ տեղում»,- շեշտեց նախարարը և հավելեց, որ այն հանրապետության պտուղ-բանջարեղեն վերամշակող ճյուղի միակ գործարանն է, որը կառուցվել է զրոյից և որը մեծապես կնպաստի Արմավիրի մարզի գյուղատնտեսության զարգացմանը:

Նախարարը կարևորեց, որ գործարանի արտադրամասերը հագեցած են եվրոպական սարքավորումներով, ինչը նոր մշակույթ է Հայաստանի վերամշակող ճյուղի կյանքում: Նա նաև գոհունակություն հայտնեց, որ գործարանի հզորությունները թույլ են տալիս տարեկան վերամշակել 40 հազար տոննա պտուղ-բանջարեղեն և ամբոջությամբ արտահանել դրանցից ստացված 15 հազար տոննա պատրաստի արտադրանքը:

ՀՀ նախագահ Սերժ Սարգսյանն ու նրան ուղեկցող անձինք շրջեցին նորաբաց գործարանի տարածքում, ծանոթացան կարողություններին ու արտադրությանը: Բացատրություններ էր տալիս «Եվրոթերմ» ընկերության տնօրեն Վահե Ղազարյանը: Նա նշեց, որ գործարանի արտադրանքն արտահանվելու է Ռուսաստան, ԱՄՆ, Ֆրանիսիա, Արաբական Էմիրություններ:

Այնուհետև կայացավ նախագահ Սերժ Սարգսյանի հանդիպումը գյուղատնտեսական մթերք վերամշակող ընկերությունների ղեկավարների հետ:
Հանդիպմանը ՀՀ գյուղատնտեսության նախարարը և վերամշակող ընկերությունների ղեկավարները Հանրապետության նախագահին ներկայացրեցին ընթացիկ տարում պտուղ-բանջարեղենի մթերման, ինչպես նաև արտահանման հետ կապված խնդիրներն ու մտահոգությունները: Ծավալված քննարկման արդյունքում նախագահի կողմից համապատասխան գերատեսչությունների ղեկավարներին հանձնարարվեց բարձրացված խնդիրների լուծման ուղղությամբ անհրաժեշտ քայլեր ձեռնարկել: Հանրապետության ղեկավարը, մասնավորապես, նշեց, որ ձեռնարկվելիք քայլերի հիմքում պետք է լինի պետություն-վերամշակող ձեռնարկություններ համատեղ և արդյունավետ աշխատանքը, որի արդյունքում հնարավոր կլինի բարձրացված խնդիրների լուծման ուղղությամբ առաջխաղացում արձանագրել:

Հանձնարարվեց գործնական քայլեր ձեռնարկել գյուղացու աճեցրած լոլիկի և դեղձի բերքը ամբողջությամբ և խելամիտ գներով մթերելու, վճարումները ժամանակին կատարելու համար:

Զգուշացվեցին իրենց պարտականությունների մեջ թերացող առանձին կազմակերպությունների ղեկավարներ, որոնցից պահանջվեց ամենակարճ ժամկետում կարգավորել մթերումների գործընթացը և գյուղացիներից ընդունել իրենց արտադրական հզորություններին համապատասխանող մթերքի ծավալներ:

«Մթերվող հումքի դիմաց գյուղացին անմիջապես պետք է վճարվի: Իսկ խաղողի մթերման նվազագույն գինը 140 դրամից ցածր չպետք է լինի»,- ասաց ՀՀ նախագահը:

Խորհրդակցության մասնակիցները պատրաստակամորեն ընդունեցին նախագահի հանձնարարականները և խոստացան անել ամեն ինչ, ընթացիկ տարվա հարուստ բերքն անկորուստ և ժամանակին մթերելու համար։