Տարածաշրջանային սեմինար Երևանում

Սեպտեմբերի 3-ին Երևանի «Բեստ Վեստերն Կոնգրես» հյուրանոցում մեկնարկել է ՀՀ կենտրոնական բանկի և ԱՄՆ Դաշնային պահուստային համակարգի համատեղ կազմակերպած «Ռիսկի վրա հիմնված վերահսկողություն և ռիսկերի գնահատում» թեմայով տարածաշրջանային 5-օրյա սեմինարը, որին մասնակցում են Ռուսաստանի, Ուկրաինիայի, Բելոռուսի, Սերբիայի, Լատվայի, Լեհաստանի, Լիբանանի, Տաջիկստանի, Ղազախստանի և Հայաստանի կենտրոնական բանկերի վերահսկողության ոլորտի ավելի քան 30 մասնագետներ:

Սեմինարին բացման խոսքով հանդես են եկել Կենտրոնական բանկի խորհրդի անդամ Վախթանգ Աբրահամյանը և ԱՄՆ Դաշնային պահուստային համակարգի տնօրենների խորհրդի բանկային վերահսկողության եւ կարգավորման դեպարտամենտի խորհրդատու Սարգիս Յոգուրջյանը, որոնք նշել են, որ նման տարածաշրջանային սեմինարները դառնում են ավանդույթ և հնարավորություն են տալիս մեկտեղ բերել ոլորտի առաջնակարգ փորձագետներին և մասնագետներին, որտեղ նրանք հնարավորություն ունեն ծանոթանալու ֆինանսա-բանկային համակարգի գլոբալ զարգացումներին և փորձի փոխանակում իրականացնել:

Սեմինարի ընթացքում ԱՄՆ դաշնային պահուստային համակարգի բանկային վերահսկողության վարչության աշխատակիցներ Ռոբերտ Ուոքերը և Կրեիգ Ֆրասատին ներկայացնելու են գլոբալ ֆինանսական ճգնաժամին ու վերջինիս դասերին, ռիսկի վրա հիմնված վերահսկողության, վարկային, գործառնական, համախառն ռիսկերին վերաբերող հարցեր: Սեմինարի ընթացքում անցկացվելու են գործնական պարապմունքներ: