Մամուլի ասուլիս՝ «ԱրմԹեք 2012» ամենամյա համաժողովի թեմայով

Այսօր ՀՀ էկոնոմիկայի նախարարության նիստերի դահլիճում կայացավ մամուլի ասուլի՝ նվիրված «ԱրմԹեք» համաժողովին:

Ասուլիսի բանախոսներն էին՝ ՀՀ էկոնոմիկայի նախարար Տիգրան Դավթյանը, Ձեռնարկությունների ինկուբատոր հիմնադրամի տնօրեն Բագրատ Ենգիբարյանը, «Վիասֆեր» տեխնոպարկի նախագահ Թոնի Մորոյանը, «Սինոփսիս-Արմենիա» ընկերության տնօրեն Հովիկ Մուսայելյանը:

ՀՀ վարչապետի բարձր հովանու ներքո անցկացվող Հայաստանի բարձր տեխնոլոգիաների ոլորտի հինգերորդ ամենամյա «ԱրմԹեք» համաժողովն այս տարի տեղի կունենա նոյեմբերի 14-15-ին ԱՄՆ-ում՝ Սիլիկոնյան հովտի Սթենֆորդի համալսարանում: «ԱրմԹեք 2012»-ը երրորդ համաժողովն է, որն անցկացվում է Սիլիկոնյան հովտում:

Համաժողովը նպատակ ունի աջակցել Հայաստանի բարձր տեխնոլոգիաների ոլորտի զարգացմանը՝ խթանելով միջազգային գործարար կապերի ամրապնդումը և ներդրումների աճը: Այն կարևորվում է որպես Հայաստանի տեխնոլոգիական և տնտեսական ձեռքբերումների առաջխաղացմանն ուղղված ռազմավարության ու նախաձեռնությունների քննարկման, ծրագրման և արդյունավետ իրագործման կարևորագույն հարթակ: Համաժողովը նաև բացառիկ հնարավորություն է ներկայացնելու հայաստանյան բարձր տեխնոլոգիաների ոլորտը միջազգային տեխնոլոգիական համայնքին, և համաշխարհային մակարդակով բարձրացնելու Հայաստանի՝ որպես աշխարհում առավել արագ զարգացող բարձր տեխնոլոգիաների ոլորտ ունեցող երկրի վարկանիշը:

«ԱրմԹեք 2012»-ին կմասնակցեն պետական գերատեսչությունների, արդյունաբերության, կրթական հաստատությունների ղեկավարներ և մասնագետներ Հայաստանից, ԱՄՆ-ից, Ռուսաստանից, Ավստրալիայից, Եվրոպայից, Լատինական Ամերիկայից և ԱՊՀ երկրներից: Համաժողովի շրջանակում կքննարկվեն Հայաստանում բարձր տեխնոլոգիաների ոլորտի գործարար միջավայրը, գիտակրթական համակարգը, ոլորտի ֆինանսավորման հարթակները և ներդրումային հնարավորությունները, կներկայացվեն ոլորտի ձեռքբերումներն ու հեռանկարները: Հեղինակավոր բանախոսների մասնակցությունը նոր որակ կհաղորդի համաժողովին, ինչպես նաև կբարձրացնի հետաքրքրությունը արագ զարգացող հայկական բարձր տեխնոլոգիաների ոլորտի հանդեպ:

«ԱրմԹեք» համաժողովը պետություն-մասնավոր հատված-միջազգային կառույցներ համագործակցությամբ անցկացվող խոշորագույն միջոցառումներից է:

«ԱրմԹեք» համաժողովի վերաբերյալ մանրամասն տեղեկություններ կարող եք ստանալ՝ այցելելով www.armtechcongress.com կայքէջ: