Պարենային ապրանքների գները նվազել են 0.8%-ով

2012թ. օգոստոսին, հուլիսի համեմատ, ՀՀ սպառողական շուկայում արձանագրվել է 0.4% գնանկում: Պարենային ապրանքների (ներառյալ ոգելից խմիչք և ծխախոտ) գները նշված ժամանակահատվածում նվազել են 0.8%-ով: Ոչ պարենային ապրանքների շուկայում գրանցվել է 0.1% գնաճ, իսկ ծառայությունների ոլորտում սակագների ընդհանուր մակարդակը նախորդ ամսվա համեմատ մնացել է անփոփոխ:

Այս տարվա օգոստոս ամսին, 2011թ. դեկտեմբերի համեմատ, սպառողական գների ինդեքսը կազմել է 97.7%, այդ թվում, պարենային ապրանքներինը (ներառյալ ոգելից խմիչք և ծխախոտ)՝ 94.5%, ոչ պարենային ապրանքներինը՝102.3%, ծառայությունների սակագներինը՝ 101.5%: 2012թ. հունվար-օգոստոս ամիսներին սպառողական գների միջին ամսական նվազումը կազմել է 0.3%, ինչը գերազանցել է նախորդ տարվա համապատասխան ցուցանիշը 0.27 տոկոսային կետով (0.03% նվազում):

Պարենային ապրանքների գները 2012թ. օգոստոսին, հուլիսի համեմատ, հանրապետությունում արձանագրվել է 0.9% գնանկում, ինչը հիմնականում բանջարեղենի և կարտոֆիլի ապրանքախմբի, մրգի, ձվի, կենդանական և բուսական յուղերի գների 9.2-1.8%-ով նվազման արդյունք է: Դիտարկվող պարենային 13 ապրանքախմբերից 9-ում նշված ժամանակահատվածում գրանցվել է 9.2-0.1% գնանկում, իսկ 4-ում՝ 0.1-1.3% գնաճ:

Բանջարեղենի և կարտոֆիլի ապրանքախմբում 2012թ. օգոստոսին, 2011թ.-ի օգոստոսի համեմատ, արձանագրվել է 12.7%, իսկ 2012թ. հուլիսի համեմատ՝9.2% գնանկում: Վերջինս հիմնականում պայմանավորվել է սմբուկի՝ 68.4%, լոլիկի՝56.3%, կանաչ պղպեղի՝45.9%, գազարի՝ 11.6%, սխտորի՝14.9%, կարտոֆիլի՝13.0% գնանկումով: 2012թ. օգոստոսին, հուլիսի համեմատ, հանրապետությունում գրանցվել է ծաղկակաղամբի՝ 5.9%, գլուխ սոխի՝ 4.6%, սունկի՝ 2.4%, կաղամբի՝ 2.0% գնանկում: Դրան զուգընթաց, ճակնդեղի գինն աճել է 5.9%-ով, խառը կանաչեղենինը՝12.4%-ով, կանաչ սոխինը՝ 16.5%-ով, կանաչ լոբունը՝18.7%-ով, վարունգինը՝65.4%-ով:

Հանրապետության դիտարկված բոլոր քաղաքներում 2012թ.-ի օգոստոսին, հուլիսի համեմատ, բանջարեղենի և կարտոֆիլի ապրանքախմբի գները նվազել են 11.1-1.8%-ով, այդ թվում, գնանկման ամենաբարձր ցուցանիշն արձանագրվել է ք. Վանաձորում: Մայրաքաղաքում բանջարեղենի և կարտոֆիլի ապրանքախմբի գները նվազել են 10.5 %-ով:

Մրգի ապրանքախմբում 2012թ. օգոստոսին, 2011թ. օգոստոսի համեմատ արձանագրվել է 11.6%, իսկ 2012թ. հուլիսի համեմատ՝3.6% գնանկում: Վերջինս մեծապես պայմանավորվել է դեղձի՝ 53.0%, ձմերուկի՝ 39.2%, սեխի՝ 37.3%, տանձի՝ 29.5%, սալորի՝ 22.7%, խնձորի՝ 7.2% գնանկումով: Միաժամանակ, հանրապետությունում գրանցվել է կիտրոնի՝ 1.5%, նարնջի՝ 6.7%, ելակի՝ 7.9% գնաճ:

Հանրապետության դիտարկված 8 քաղաքներում 2012թ. օգոստոսին հուլիսի համեմատ մրգի գները նվազել են 8.3-0.3%-ով (գնանկման ամենաբարձր ցուցանիշն արձանագրվել է ք. Թալինում), իսկ մյուս 3 բնակավայրերում գրանցվել է 1.1-3.6% գնաճ: Մայրաքաղաքում մրգի գները նվազել են 5.2%-ով:

Կաթնամթերքի ապրանքախմբում 2012թ. օգոստոսին, 2011թ. օգոստոսի համեմատ արձանագրվել է 1.8%, իսկ 2012թ. հուլիսի համեմատ'0.7% գնանկում: Վերջինս հիմնականում պայմանավորվել է «Չանախ» և «Լոռի» պանրատեսակների՝ համապատասխանաբար 3.8% և 2.2%, կաթի փոշու՝1.0% գնանկումով:

Հանրապետության դիտարկված 8 քաղաքներում 2012թ. օգոստոսին, հուլիսի համեմատ, կաթնամթերքի գները նվազել են 2.0-0.6%-ով (մայրաքաղաքում կաթնամթերքի գները նվազել են 0.6%-ով), իսկ մյուս 3-ում պահպանվել է գների նախորդ ամսվա մակարդակը:
2012թ. օգոստոսին հուլիսի համեմատ հանրապետությունում արձանագրվել է ձկնամթերքի՝ 0.5%, սուրճի, թեյի, կակաոյի՝ 0.4%, այլ մթերքի՝ 0.3%, շաքարավազի՝0.1% գնանկում:

Այս տարվա օգոստոսին, 2011թ. օգոստոսի համեմատ, հացամթերքի ապրանքախմբում գրանցվել է 5.0%, իսկ 2012թ. հուլիսի համեմատ՝1.3% գնաճ: Վերջինս հիմնականում պայմանավորվել է բարձր տեսակի հացի՝1.4%, հացահատիկի՝ 2.4%, սիսեռի՝ 2.6%, ոլոռի՝ 2.7%, ալյուրի՝ 3.3% գնաճով: