Սերժ Սարգսյանի կյանքը «փրկված է»

Սեպտեմբերի 4-ին Գյումրի գնալու ճանապարհին մի զավեշտալի դեպք պատահեց, որը բնութագրում է մեր «ժողովրդավար» երկրի այսօրվա մռայլ իրականությունը:

ՀՀ նախագահի պաշտոնը զբաղեցնող անձը Գյումրիից վերադառնում էր, մենք էլ, բանից անտեղյակ, «համարձակվել» էինք ուղևորվել Գյումրի: Ախուրյան չհասած` հանդիպեցինք մի բազմամեքենա շարասյան, բայց չհասկացանք՝ ինչ է կատարվում: Ուղեկցող պետավտոտեսչության մեքենան լուսային ազդանշան տվեց և ինչ-որ բան «գռմռաց» բարձրախոսով։ Չհասկանալով, թե ինչ են ուզում ասել, մենք ճանապարհի աջ կողմով, որքան հնարավոր է դանդաղ շարունակեցինք ընթացքը: 100 մետր չհասցրեցինք ընթանալ՝ ճանապարհային ոստիկանները փակեցին ամբողջ մայրուղին՝ կանգնեցնելով մեր մեքենան: Պետավտոտեսուչները պահանջեցին փաստաթուղթ ներկայացնել՝ առանց հիմնավորելու, թե ինչու են կանգնեցրել: Ես, բնականաբար, չներկայացրեցի որևէ փաստաթուղթ և օրենքի տառին համապատասխան պահանջեցի հիմնավորում, որին այդպես էլ պատասխան չստացա: 10 րոպե մայրուղին փակ պահելով, այդպես էլ չհիմնավորելով կանգնեցնելու պատճառը և ակնհայտորեն չարաշահելով իրենց լիազորությունները` խլեցին հեռախոսս, որով փորձում էի նկարահանել իրենց կատարած ապօրինի գործողությունները: Վերջապես, ստանալով սպասված հիմավորումը, որը օրենքի հետ ոչ մի կապ չուներ, այն է՝ «նախագահի անվտանգության պետն է ասել էս ավտոն տանենք տուգանային հրապարակ», ես փորձեցի դուրս գալ մեքենայից, ինչում «բավականին նրբանկատ ձևով» ինձ օգնեցին պետավտոտեսուչները ՝ կիրառելով բռնություն, խեղդելով մեքենայիս անվտանգության գոտիով: «Հանցագործության» կանխման այս աննախադեպ օպերացիայից հետո ինձ նստեցրեցին նախապես կանչված ոստիկանական մեքենան և տեղափոխեցին Ախուրյանի ներքին գործերի բաժին, իսկ մեքենաս՝ Գյումրու տուգանային հրապարակ՝ ընկերներիս հետ միասին:

Երբ բաժին տանելու Ճանապարհին ոստիկաններից պահանջեցի ներկայացնել բերման ենթարկելու պատճառները, պարզվեց, որ իրենք էլ չգիտեն.«Ասել են տանենք, կգնանք կասեն ինչի ենք տարել»:

Համակարգը իր ապօրինություններով հանդերձ ոստիկաններին ներկայացնելուց հետո մտերմիկ «քաղաքացիական» զրույցի բռնվեցինք, ինչը շարունակվեց ոստիկանության բաժնի պետի, նրա տեղակալի ու դատախազի հետ: Բոլորը, հասկանալով դեպքի անիմաստության աստիճանը, չգիտեին ինչ անել, քանի որ մի կողմից ես հստակ ներկայացնում և հիմնավորում էի բերման ենթարկելու ապօրինի լինելը, մյուս կողմից՝ «վերևից» օրենքի հետ կապ չունեցող հրաման կար:

Որոշ ժամանակ անց «օգնության հասավ» նաև Գյումրու իրավապաշտպաններից մեկը։ Վերջապես, հասկանալով, որ իրենց համար մեծ խնդիրներ են ստեղծվելու և ստանալով վերևների «դաբրոն», ինձ մեծ ուրախությամբ ճանապարհեցին:

Ինքս չցանկացա բողոք ներկայացնել իրենց պաշտոնական լիազորությունները չարաշահած, իմ հանդեպ բռնություն կիրառած պետավտոտեսուչների և ինձ ապօրինի բերման ենթարկած ոստիկանների դեմ՝ դրանով իսկ ոստիկանների հանդեպ ցուցաբերելով մարդկային մոտեցում, քանի-որ կատարել էին վերադասի ապօրինի հրամանը, իսկ այս դեպքում հրամանը շատ վերևից էր։

Ես ամենևին չեմ արդարացնում իրենց վայրենի գործողություններն ու մտածելակերպը, ուղղակի ներում եմ: Ամեն դեպքում այդ միջադեպը դաս եղավ բոլոր ներգրավված ոստիկանների համար, քանի որ հասկացան, թե ինչպես պետք է իրեն պահի ոստիկանը և ինչպես չի կարելի վարվել քաղաքացու հետ:

Եղեք իրավագիտակից և արժանապատիվ քաղաքացի։

ՀՀ քաղաքացի՝ Կարեն Հարությունյան