Ծառայությունների ոլորտում գնային փոփոխություններ չեն գրանցվել

Բնակչությանը մատուցված ծառայությունների ոլորտում 2012թ. օգոստոսին, հուլիսի համեմատ, արձանագրված սակագների անփոփոխ ընդհանուր մակարդակի պայմաններում ծառայությունների որոշ տեսակների սակագներն աճել են, որոշ տեսակներինն էլ նվազել:

Կենցաղային բնույթի ծառայությունների սակագները նշված ժամանակահատվածում աճել են 0.1%-ով, հանրային սննդի ծառայություններինը՝ 0.2%-ով: Միաժամանակ, հանրապետությունում գրանցվել է հանգստի կազմակերպման՝0.8%, մշակույթի ոլորտի՝0.3% և տրանսպորտի՝0.3% ծառայությունների սակագների նվազում, իսկ բնակարանային-կոմունալ, բուժսպասարկման, կապի, իրավական ու բանկային ծառայությունների սակագների մակարդակը նախորդ ամսվա համեմատ մնացել է անփոփոխ:

Հանրապետության դիտարկված 4 քաղաքներում 2012թ. օգոստոսին, հուլիսի համեմատ, արձանագրվել է ծառայությունների սակագների 0.1-0.2% հավելաճ, 2-ում՝ 0.2-0.1% նվազում, իսկ մյուս 5 քաղաքներում ծառայությունների սակագների մակարդակը նախորդ ամսվա համեմատ մնացել է անփոփոխ: Մայրաքաղաքում ծառայությունների սակագների մակարդակը նվազել է 0.1%-ով: