Հանդիպել են Հայաստանի և Իրաքի գյուղատնտեսության նախարարները

ՀՀ գյուղատնտեսության նախարար Սերգո Կարապետյանը երեկ՝ սեպտեմբերի 5-ին, ընդունել է քառօրյա պաշտոնական այցով Իրաքի Հանրապետության փոխվարչապետ Ռոշ Նուրի Շաույեսի գլխավորությամբ Հայաստան ժամանած պատվիրակության կազմում ընդգրկված Իրաքի գյուղատնտեսության նախարար Իզ ադ – Դին Աբդ Ալլահ Հուսայինին:
Հանդիպումը կրում էր ճանաչողական բնույթ, ուստի կողմերն անդրադարձել են երկու երկրների ժողովուրդների միջև հաստատված փոխադարձ հարգանքին ու բարեկամությանը: Նախարարները նշել են գյուղատնտեսության բնագավառում երկկողմ համագործակցությունը սերտացնելու և խորացնելու անհրաժեշտությունը: Մասնավորապես, ՀՀ գյուղատնտեսության նախարար Սերգո Կարապետյանը նշել է, որ բնագավառն ունի երկկողմ համագործակցության ընդլայնման մեծ ներուժ և անհրաժեշտ է մանրամասն ուսումնասիրել առկա հնարավորությունները և անցնել կոնկրետ, գործնական քայլերի:
Հանդիպման ժամանակ ՀՀ գյուղատնտեսության նախարարը նշել է, որ Հայաստանի Հանրապետությունը կարող է առաջարկել Հայաստանից Իրաք արտահանել թարմ պտուղ-բանջարեղեն, կարտոֆիլ, հանքային և խմելու ջրեր, բնական հյութեր և բանջարեղենային պահածոներ: Իրաքյան կողմի ցանկության դեպքում ՀՀ գյուղատնտեսության նախարարությունը կարող է նաև առաջարկել կենդանի ոչխարների, բրդի, ձկնեղենի արտահանում:
Իրաքի նախարար ադ Հուսայինը շնորհակալություն է հայտնել հանդիպման համար և նշել, որ իրենք ևս պատրաստակամ են համագործակցություն ծավալել ՀՀ գյուղատնտեսության նախարարության հետ, որը հնարավորություն կտա բացահայտելու նոր շուկաներ և, որ ամենից կարևորն է, հեռավորության տեսակետից երկրներն ունեն , բավականին շահեկան դիրք:
ՀՀ գյուղատնտեսության նախարարի խնդրանքով նախարար ադ Հուսայինը ներկայացրել է Իրաքի ներկայիս գյուղատնտեսության վիճակը և փաստել, որ երկարատև պատերազմներից հետո իրենց տնտեսությունը, մասնավորապես գյուղատնտեսությունը, բավականին թուլացել է և այն վերականգնելու համար պահանջվում են մեծ ջանքեր: Նշել է նաև, որ Իրաքը գյուղատնտեսության համար ունի լավ պայմաններ և , անհրաժեշտ է համախմբելով ողջ ուժերը, վերականգնել տնտեսության համար այդ կարևոր ճյուղը:
«Երկրում վերականգնվում են ոռոգման համակարգերը, կառուցվում են նոր գյուղական բնակավայրեր , գյուղացիներին տրվում են արտոնություններ հողերի վարձակալման, ֆինանսական և նյութատեխնիկական աջակցություն»,- նշել է ադ Հուսայինը:
Իրաքի նախարարը տեղեկացրել է, որ երկրի կառավարության որդեգրած քաղաքականությունը նպատակ ունի ներդնել ժամանակակից տեխնոլոգիաներ և հնարավոր համարել այս ուղղությամբ համագործակցել և ուսումնասիրել Հայաստանի փորձը:
Նախարար Սերգո Կարապետյանը համակարծիք լինելով իր գործընկերոջ հետ գյուղատնտեսության արդիականացման հարցում՝ պատրաստակամություն է հայտնել օժանդակություն ցուցաբերել իրաքյան կողմին փորձի փոխանակման, մասնագետների վերապատրաստման, ուսուցման հարցերում:
Նախարար Ս. Կարապետյանն առաջարկել է նաև քննարկել երկու երկրների միջև գյուղատնտեսության բնագավառում համագործակցության համաձայանագիր ստորագրելու նպատակահարմարության հարցը, ինչը կնպաստի համագործակցությունն իրավական հիմքերի վրա դնելուն և արդյունավետ դարձնելուն: Նախարարը նշել է, որ իրաքյան կողմի սկզբունքային համաձայնության դեպքում ՀՀ գյուղատնտեսության նախարարությունը կմշակի նշված համաձայնագրի նախագիծ՝ հետագայում երկկողմ շահագրգիռ քննարկումների ներկայացնելու նպատակով:
Իրաքի գյուղատնտեսության նախարարն ընդունել է համատեղ համաձայնագրի պատրաստման և ստորագրման ՀՀ գյուղատնտեսության նախարարի առաջարկը: