Երևանում տեղի ունեցավ հայ-թուրքմենական միջկառավարական հանձնաժողովի նիստը

2012թ. սեպտեմբերի 5-7-ը Երևանում տեղի է ունեցել Հայաստանի Հանրապետության և Թուրքմենստանի միջև տնտեսական համագործակցության միջկառավարական հանձնաժողովի չորրորդ նիստը: Նիստը բացել են հանձնաժողովի հայկական կողմի նախագահ, ՀՀ էներգետիկայի և բնական պաշարների նախարար Արմեն Մովսիսյանը և թուրքմենական կողմի համանախագահ, Թուրքմենստանի փոխվարչապետ Սապարդուրդի Տոյլիևը:

Նիստին մասնակցում էին հանձնաժողովի անդամները, ինչպես նաև՝ երկու երկրների նախարարությունների և այլ գերատեսչությունների պաշտոնատար անձինք: Հանձնաժողովի չորրորդ նիստի օրակարգում ընդգրկված էին երկու երկրների տնտեսության տարբեր ոլորտներին առնչվող հարցեր:

Նիստի ընթացքում քննարկվել են Հայաստանի Հանրապետության և Թուրքմենստանի միջև առևտրատնտեսական համագործակցության, իրավապայմանագրային դաշտի զարգացմանը վերաբերող խնդիրները, ինչպես նաև՝ ստանդարտացման և պետական վերահսկողության, վառելիքաէներգետիկ, տրանսպորտի և կապի, առողջապահության, գյուղատնտեսության ոլորտներում, կրթության և գիտության, ինչպես նաև մշակութային-հումանիտար բնագավառներում համագործակցության հարցերը: Քննարկվել են մասնավորապես՝ թուրքմենական բամբակյա թելերը, տեքստիլ արտադրանքը Հայաստան ներմուծելու, ինչպես նաև Հայաստանի՝ բարձր տեխնալոգիաների զարգացման առաջատար փորձը՝ Թուրքմենստանում կիրառելու հնարավորությունները:

Նիստի ավարտին ստորագրվել է Հայաստանի Հանրապետության և Թուրքմենստանի միջև տնտեսական համագործակցության միջկառավարական հանձնաժողովի չորրորդ նիստի արձանագրությունը:

Կողմերը պայմանավորվել են հանձնաժողովի հինգերորդ նիստն անցկացնել Աշգաբադում՝ 2013թ.-ին: