Իրավապահ մարմինները պետք է անհանգստանան. Ստյոպա Սաֆարյան

ՀՀԿ ԱԺ պատգամավոր Ռուբեն Հայրապետյանը հարցազրույց է տվել «Նուվել դ’Արմենի Մագազին» ֆրանսիական ամսագրին, որում սպառնացել է «Պահանջում ենք պատժել «Հարսնաքարում» տեղի ունեցածի բոլոր մեղավորներին» նախաձեռնության ակտիվիստներին։

Այս առթիվ Lurer.com–ը զրուցեց «Ժառանգություն» կուսակցության գլխավոր քարտուղար Ստյոպա Սաֆարյանի հետ. 

«Ես անընդունելի եմ համարում «Հարսնաքարի» սպանության բացահայտման համար պայքարող մարդկանց, ակտիվիստների հասցեին սպառնալիքները։ Կարծում եմ՝  ինքը դրա համար պետք է բացատրություն տա, իսկ իրավապահ մարմինները պետք է անհանգստանան, քանի որ նա հարցազրույցով ուղղակիորեն սպառնալիքներ է հնչեցրել մարդկանց հասցեին։ Պետք է պատկան մարմինների ուշադրությունը հրավիրել այս ամենի վրա։ Ըստ էության՝ սպառնալիքները կարող են լուրջ հետևանքներ ունենալ։ Ինձ համար չափազանց մտահոգիչ և անթույլատրելի են հնչած արտահայտությունները։

Պետք է ավելի հանդուրժող լինել՝ հատկապես, երբ այդ շարժումները բռնության կոչեր չեն արել, կամ անմիջական վտանգ չեն ներկայացրել Ռուբեն Հայրապետյանի նկատմամբ։ Եթե անգամ իրեն զրպարտող է համարում այդ շարժումները, եթե բողոքի ակցիաների ընթացքում հնչող կոչերը զրպարտություններ են, ապա դրա դեմ սպառնալիքով չէ, որ պետք է պատասխանի։ Օրենքով սահմանված բազմաթիվ եղանակներ կան՝ պաշտպանելու սեփական արժանապատվությունը։ Քաղաքացիական ակտիվիստների վերաբերյալ հնչած սպառնալիքները այս համատեքստում անընդունելի է, և օրենքին հակասելի»։