Ռուսաստանի ընդդիմադիր ճակատի առաջնորդներից մեկին հոսպիտալացրել են

Արդեն հինգ օր ձերբակալված, չարտոնված ցույցերի կազմակերպիչ, ընդդիմության «Ձախ ճակատ»-ի համակարգող Սերգեյ Ուդալցովն առողջական վիճակի կտրուկ վատթարացման պատճառով բանտից տեղափոխվել է հիվանդանոց:

«Դեկտեմբերի 8-ին Սերգեյ Ուդալցովը Բոտկինի անվան հիվանդանոց է տեղափոխվել 4-օրյա հացադուլից հետո», - "Ինտերֆաքս" լրատվականին է փոխանցել ընդդիմադիր գործչի կինը:

Վերջինիս խոսքերով իր ամուսինը` նույնիսկ հիվանդանոցում, խիստ հսկողության տակ է առնված:

«Ոստիկանության աշխատակիցները նույնիսկ մեկ քայլ չեն հեռանում նրանից, անձնական իրերը չեն տալիս, անգամ թույլ չեն տալիս զանգահարել»,- ասել է Ուդալցովի կինը: