Հայաստանը կներմուծի հայկական ծխախո՞տ

Վերջերս հայ գործարար, «Գրանդ Հոլդինգ»-ի սեփականատեր Հրանտ Վարդանյանն իր հարցազրույցներից մեկի ժամանակ նշել է, որ իր բիզնեսին «նեղում» է հարկային այն օրենսդրությունը, որն իրականացվում է ՀՀ վարչապետի գլխավորությամբ: Նա նշել է, որ յուրաքանչյուր գործարարի համար կարևոր հանգամանք են տեղի հարկային և մաքսային դաշտերը, տիրող ընդհանուր մթնոլորտը և շատ այլ բաներ: Ու եթե գործարարը նկատի, որ իր երկրում լավ պայմաններ չեն առաջարկում բիզնեսի զարգացման համար, իսկ այլ տեղերում՝ այո, ապա նա անպայման իր բիզնեսը կտեղափոխի իր համար ավելի բարենպաստ պայմաններ առաջարկող վայր:

Խոսքը ծխախոտի արտադրության մասին է: Հ. Վարդանյանը, նշել է, որ եթե Հայաստանում շարունակեն «նեղել» իր բիզնեսին, ապա ինքը ստիպված կլինի ծխախոտի արտադրությունն  իրականացնել այլ երկրում և ապա միայն ծխախոտն այնտեղից ներմուծել Հայաստան: Ըստ Հ. Վարդանյանի՝ Վրաստանի հարկային և մաքսային դաշտերը լավ ուսումնասիրելու դեպքում կարելի է նկատել, որ Վրաստանն ավելի լավ պայմաններ է առաջարկում արտադրողներին, քան Հայաստանը: Նա նշել է նաև, որ Հայաստանում տեղական ծխախոտ արտադրողին ավելի վատ պայմաններ են առաջարկում, քան ներկրողին: Եթե նախկինում տեղական և ներկրված ծխախոտների սպառումը կազմում էր 60/40՝ հօգուտ տեղական արտադրողի, հիմա այն կազմում է 50/50 և եթե այսպես շարունակվի, ապա տեղական ծխախոտի սպառումը կնվազի:

Հ. Վարդանյանը նշել է նաև, որ իրեն հարկային արտոնություններ պետք չեն ո՛չ Հայաստանում և ո՛չ էլ ուրիշ երկրում, միայն անհրաժեշտ է ճիշտ հարկային քաղաքականություն վարել:

Հիմա հարց է ծագում՝ ի՞նչ է անում ՀՀ կառավարությունը: Ինչպե՞ս են կարողանալու զարգացնել հայկական տնտեսությունը, եթե հայ գործարարը դուրս է գնում Հայաստանից: Ինչպե՞ս են պատրաստվում օժանդակել սիրիահայ գործարարներին նրանց բիզնեսը Հայաստան տեղափոխելու հարցում: Անհրաժեշտ է հարկային բարեփոխումներ կատարել, որպեսզի հայ արտադրողն իրեն իր երկրում ապահով և վստահ զգա, և ոչ թե արտերկրում այլընտրանք փնտրի: Հայաստանից կապիտալի արտահոսքը մեծանում է, գործարարները խոսում են Հայաստանից իրենց արտադրությունը դուրս բերելու մասին: Հետաքրքիր է՝ ինչպե՞ս կդիտվի այն փաստը, երբ հայկական ծխախոտը Հայաստան ներմուծվի: Առայժմ Հ. Վարդանյանն է նշել այդ մասին, իսկ թե քանի գործարար է համակարծիք Հ. Վարդանյանին, հայտնի չէ:

Եթե այսպես շարունակվի, ապա Հայաստանից դուրս կբերվեն բոլոր արտադրությունները և այլ երկրներից կսկսեն ներմուծել հայկական արտադրանք: