Ճապոնիան նվազեցնում է տնտեսական աճի ցուցանիշները

Ճապոնիան հայտարարել է այս տարվա երկրորդ կիսամյակում երկրի տնտեսական աճի տեմպերի նվազեցման մասին, ինչը վկայում է այն մասին, որ աշխարհի՝ մեծությամբ երրորդ երկրի տնտեսության աճի տեմպերը դանդաղում են:

Ըստ երկրի ղեկավարության տվյալների՝ ապրիլ-հունիս ամիսներին տնտեսության միջին տարեկան աճը կազմել է 0.7%. դա սահմանվածից երկու անգամ ցածր է: Նախորդ եռամսյակի տվյալների համեմատ՝ տնտեսությունն աճել է ընդամենը 0.2%-ով: Դա խոսում է այն մասին, որ նվազում են արտահանման ծավալները և ներքին շուկայի պահանջարկը:

«Տնտեսության աճի ցուցանիշի վերանայումը շատ կարևոր է, քանի որ հայտնի է դառնում, որ արտադրության և ներդրումների ծավալները ցածր են երկրի կառավարության կանխատեսումներից»,- BBC-ի հետ զրույցում ասել է Տոկիոյի հետազոտական ինստիտուտի՝ Fujitsu-ի գլխավոր տնտեսագետ Մարտին Շուլցը: Արդյունքում տնտեսության անկումը նախատեսվածից ավելի արագ է կատարվում:

Ճապոնական տնտեսության աճի տեմպերի վրա ազդեցություն են ունենում ինչպես միջազգային, այնպես էլ՝ ներքին գործոնները:
Արտահանման սեկտորը, որը ճապոնական տնտեսության զարգացման գլխավոր շարժիչն է, զգալի տուժել է, որի պատճառը հիմնական շուկաներում (ԱՄՆ և Եվրագոտի) ճապոնական արտադրանքի պահանջարկի նվազումն է:

Միաժամանակ նվազել են նաև Հնդկաստանի և Չինաստանի տնտեսական աճի ցուցանիշները՝ չնայած այդ երկրներն ավելի լավ են կարողացել դիմակայել ֆինանսական ճգնաժամի հասցրած հարվածներին: Չինական և հնդկական տնտեսական ցածր մակարդակները նույնպես իր վատ ազդեցությունն են ունեցել Ճապոնիայի տնտեսության վրա:

Ըստ վերլուծաբանների՝ ճապոնական արտահանման ծավալների կրճատումը դոմինոյի ազդեցություն է թողել կոորպորատիվ ներդրումների վրա, ինչը նույնպես բացասական ազդեցություն է ունեցել տնտեսական ցուցանիշների վրա:

Մարտին Շուլցը գտնում է, որ Ասիան, մասնավորապես՝ Չինաստանը, Ճապոնիայի համար կարևոր շուկաներ են, և տվյալ երկրների տնտեսության անկումը բացասական հետևանք է թողնում ոչ միայն Ճապոնիայի տնտեսության վրա, այլև՝ գործարար միջավայրի և կոորպորատվի ներդրումների:

Վիճակն ավելի է բարդանում ներքին գործոնների ազդեցությունից, երբ Ճապոնիայի ներքին շուկայի պահանջարկի ցուցանիշներն այնքան չեն աճում, որ փոխհատուցեն ցածր արտահանման ծավալներից ստացված վնասները, ինչը նույնպես բացասական է ազդում Ճապոնիայի գործարար միջավայրի վրա:

Շուլցը կանխատեսում է, որ եթե տնտեսական աճի տեմպերը նման ձևով շարունակվեն, ապա արդեն հաջորդ եռամսյակում ճապոնական տնտեսության ցուցանիշները բացասական միտում կունենան: