Կաթնամթերքում այլևս սոդա չկա

ՀՀ գյուղատնտեսության նախարարության Սննդամթերքի անվտանգության պետական ծառայությունը ուսումնասիրություն է անցկացրել կաթի և կաթնամթերք արտադրող խոշոր ընկերություններում: Տեսչական ստուգումների անցկացման հիմք է հանդիսացել հայտնաբերված խախտումները:

Այսօր լրագրողների հետ հանդիպման ժամանակ Սննդամթերքի անվտանգության պետական ծառայության պետ Աբրամ Բախչագուլյանը նշեց, որ կաթնամթերք արտադրող յոթ ընկերությունների արտադրության մեջ հայտնաբերվել էր սոդա, սակայն տեսչական ստուգումից հետո արտադրողները վերացրել են տվյալ թերությունը:

Աբրամ Բախչագուլյանը, մասնավորապես, ասել է. «Մենք հասանք մեր նպատակին: Մեր արտադրողների հետ միասին պետք է կարողանանք հսկողություն սահմանել թե՛ արտադրության և թե՛ մթերման գործընթացում: Ստուգումները շարունակական բնույթ են կրելու և այսպիսի ուսումնասիրություններ մյուս ոլորտներում նույնպես լինելու են»:

Ծառայության պետը, անդրադառնալով տուգանքներին, նշեց, որ ծառայությունն ավարտել է կաթնամթերքում սոդայի մասով լաբորատոր հետազոտությունը: Ըստ նրա՝ տեսչական ստուգումները դեռ շարունակվում են, եթե ստուգման ընթացքում լուրջ խախտումներ չհայտնաբերվեն, ապա արդյունքները կամփոփվեն 18-20 օրվա ընթացքում: Իսկ խախտումներ հայտնաբերելու դեպքում տնտեսվարողները կտուգանվեն 30,000 ՀՀ դրամից մինչև 300,000 ՀՀ դրամի չափով:

Լրագրողների այն հարցին, թե ինչքան են տուգանքի չափերը, Ա. Բախչագուլյանը հրաժարվեց որևէ մեկնաբանություն տալ. «Մեր խնդիրը ի վերջո տուգանելը չէ, այլ խնդիրը վերացնելն է: Եթե բոլոր խախտումները հրապարակային դարձնելուց հետ վերանան, ապա մենք կունենանք անվտանգ սնունդ»:

Հիշեցնենք, որ ծառայությունը կաթի և կաթնամաթերքի արտադրությամբ զբաղվող ընկերություններում ուսումնասիրություններ է կատարել՝ սոդայի կեղծվածության, բուսական յուղի և կաթի փոշու առկայության վերաբերյալ: ՀՀ կառավարության սեպտեմբերի 6-ի նիստում Աբրամ Բախչագուլյանը տեղեկացրել էր, որ սոդայով կեղծվածություն է հայտնաբերվել «Անի-Թամարա», «Բիոկաթ», «Դուստր Մարիաննա», «Արզնի կաթ», «Աշտարակ-կաթ», «Մուլտի ագրո» և «Թամարա» ընկերությունների կաթի արտադրանքում։