«Հյուսիս-hարավ» ճանապարհային միջանցք ներդրումային ծրագրի ներկա վիճակի մասին

Ս.թ. սեպտեմբերի 13-ին Երևան-Արարատ և Երևան-Աշտարակ ճանապարհահատվածներում շինարարական աշխատանքների հանդիսավոր մեկնարկի կապակցությամբ ՀՀ տրանսպորտի և կապի նախարարությունը նշում է.

1. Ընդհանուր տեղեկություն Հյուսիս-hարավ ծրագրի ներկա վիճակի մասին
«Հյուսիս-hարավ» ճանապարհային միջանցքի կառուցման նպատակն է Հայաստանի և Իրանի սահմանային հատման կետից մինչև Հայաստանի և Վրաստանի սահմանային հատման կետը 556կմ բարձրակարգ՝ միջազգային չափանիշներին համապատասխան, բետոնյա ծածկույթով ավտոմոբիլային ճանապարհի կառուցում:

Ծրագրի իրականացման համար Հայաստանի Հանրապետության և Ասիական զարգացման Բանկի (ԱԶԲ) միջև 15.09.2009 թ. կնքվել է Շրջանակային ֆինանսավորման համաձայնագիր, որով նախատեսվում է 962 մլն ԱՄՆ դոլարի ֆինանսավորում, որից Ասիական զարգացման բանկի մասը կազմում է 500 մլն ԱՄՆ դոլար:

Ծրագիրը տրոհված է առանձին տրանշերի՝

Տրանշ 1-ով՝ (ԱԶԲ վարկ 60 մլն. ԱՄՆ դոլար և ՀՀ կառավարության համաֆինանսավորում՝ 10 մլն. ԱՄՆ դոլար) ստորագրված համաձայնագրով նախատեսվում է առանց հողերի օտարման Երևան– Աշտարակ /11.403կմ/ և Երևան– Արարատ /38.105կմ/ ճանապարհահատվածների վերակառուցում,

Տրանշ 2-ով՝ (ԱԶԲ 170 մլն.ԱՄՆ դոլար և ՀՀ կառավարության համաֆինանսավորում՝ 40 մլն. ԱՄՆ դոլար) ստորագրված համաձայնագրով նախատեսվում է Աշտարակ-Թալին 41.9 կմ ճանապարհահատվածի վերակառուցում,

Տրանշ 3-ով՝ որի վարկային համաձայնագիրը դեռևս չի ստորագրված, նախատեսվում է Թալին-Գյումրի 45.567 կմ ճանապարհահատվածի վերակառուցում:

Ներկայումս վերոհիշյալ ճանապարհահատվածների նախագծերը, ներառյալ Տրանշ 3-ի մրցութային փաթեթը, պատրաստ են: Նախագծային աշխատանքներն իրականացրել է «EGIS International (Էջիսինտերնեյշնլ)» /Ֆրանսիա/ կազմակերպությունը:

Նախագծով նախատեսվում է ապահովել 100 կմ/ժամ արագությամբ և 4 երթևեկելի գոտիներով արագընթաց մայրուղի: Յուրաքանչյուր երթևեկելի մասը ունենալու է 2 երթևեկելի շերտ՝ յուրաքանչյուրը 3.6 մ լայնությամբ, ինչպես նաև 3.8 մ կենտրոնական բաժանիչ գոտի կահավորված չընդհատվող մետաղական արգելափակոցներով՝ ճանապարհից օգտվողների անվտանգությունն ապահովելու համար: Գյուղատնտեսական ստորգետնյա անցումները կապահովեն գյուղատնտեսական մեխանիզմների, ինչպես նաև ընտանի կենդանիների անվտանգ անցումը:

Շինարարության արժեքը, ներառյալ ԱԱՀ-ն, գնահատված է 1 կմ-ի համար.
1. Երևան–Արարատ հատվածում՝ 500մլն դրամ
2. Երևան-Աշտարակ հատվածում՝ 870 մլն դրամ
3. Աշտարակ–Թալին հատվածում՝ 1 մլրդ 757 մլն դրամ։

Թալին – Գյումրի հատվածի շինարարության նախնական արժեքը գնահատվում է մոտ 1.3-1,5 մլրդ դրամ 1 կմ համար։

Այս գումարներում ներառված չեն հողերի օտարման հետ կապված ծախսերը, համաձայն պայմանագրի՝ հողերի օտարման ծախսերն իրականացվում է ՀՀ կառավարության կողմից:

Երևան-Արարատ և Երևան-Աշտարակ հատվածներում հողերի օտարում չի նախատեսվում, իսկ Աշտարակ-Թալին տեղամասում, որտեղ ճանապարհն անցնում է 16 համայնքներով (Փարպիից Թալին ընկած համայնքներ), նախատեսվում է հողերի օտարում: Հողերի Օտարման և տարաբնակեցման ծրագիրը /ՀՕՏԾ/, համաձայն որի՝ անհրաժեշտ հողերի/գույքի օտարումներն ու փոխհատուցումները (բյուջեն) պետք է իրականացվեն, ներկայացվել է ԱԶԲ հաստատմանը, որը ստանալուց հետո այն կներկայացվի նաև ՀՀ կառավարության հաստատմանն ու պահանջվող բյուջեի հատկացմանը: Ներկա հաշվարկներով՝ ՀՕՏԾ իրականացումը կպահանջի մոտ 2.3 մլրդ ՀՀ դրամ:

Այժմ ՀՀ կառավարության միջոցներով Աշտարակ-Թալին տեղամասում իրականացվում են հիմնական շինարարական աշխատանքներին խոչընդոտող հաղորդակցուղիների (ջրամատակարարման, գազամատակարարման, էլեկտրական օդային գծերի և հեռախոսային մալուխի տեղափոխման աշխատանքներ):

2. Ընդհանուր տեղեկություն շինարարական ընկերության՝ Իզոլուքս Կորսանի /Իսպանիա/ մասին
2004թ. տեղի ունեցավ իսպանական երկու խոշոր ըկերությունների միացում/ենթակառուցվածքների և շինարարական տեխնոլոգիաների բնագավառում/՝ Կորսան Կորվիամ և Իզոլուքս Վաթ, որի հետևանքով ստեղծվեց Իզոլուքս Կորսան ընկերությունների խումբը:

Հյուսիս-հարավ ծրագրի Երևան-Աշտարակ, Աշտարակ-Թալին և Երևան-Արարատ ճանապարհահատվածների վերակառուցման համար ս.թ. ապրիլին կայացած բաց միջազգային մրցույթի արդյունքում հաղթեց Իզոլուքս Կորսան /Իսպանիա/ ընկերությունը, 250 մլն ԱՄՆ դոլար պայմանագրային արժեքով։

Աշխատանքների ընթացքը նախատեսված է՝

- 18 ամիս՝ Երևան – Արարատ,
- 18 ամիս՝ Երևան – Աշտարակ և
- 36 ամիս՝ Աշտարակ – Թալին հատվածների համար։

Առ 04.09.2012թ. Իզոլուքս Կորսան հայաստանյան թիմը բաղկացած է 22 հոգուց՝ ծրագրի ղեկավար, արտադրության ղեկավար, ենթածրագրի ղեկավար, 3 շինարարության ինժեներներ, տեղամասային աշխատանքի ղեկավար, որակի պատասխանատու, տեխնիկական հարցերով ղեկավար, նախագծի ինժեներ, 2 տեղագրության ղեկավարներ (տեղում ուսումնասիրության և չափագրության), 2 նախագծող ինժեներ, 4 տեղազննող ինժեներ, աշխատակազմի ղեկավար, 3 բաժինների ղեկավարներ (իրավաբան, տնտեսագետ և հաշվապահ):

Աշխատանքների առումով, առ 04.09.2012, Տրանշ 1 և Տրանշ 2–ի շրջանակներում տեղազննման ճարտարագետների թիմը կատարում է հիմնային կետերի նշահարում և ցանցի ստեղծում: Սկսվել է պայմանագրային բանակցություններ տեղական ընկերությունների հետ նյութերի մատակարարման, ծառայությունների ձեռքբերման (հնագիտական պեղումների իրականացման) և այլն: Նաև իրականացվում է մոբիլիզացիոն աշխատանքներ աշխատակազմի նյութատեխնիկական ապահվման, վարչական (լիցենզավորման, հարկային, մաքսային և այլն) և տեխնիկական (նախագծի ուսումնասիրում, այլընտրանքային լուծումներ) հարցերի լուծման ուղղությամբ, ինչպես նաև գնումների կազմակերպման (տեղական և միջազգային ընկերություների հետ աշխատանքների պլանավորում և պայմանագրերի կնքում) և բոլոր պայմանագրային փաստաթղթերի նախապատրաստման մասով (կառավարման, բնապահպանական, մանրամասն աշխատանքային ծրագրի, երթևեկության կազմակերպման նախագծերի, որակի ապահովման):

Շինարարական աշխատանքների վերահսկման և ծրագրի կառավարման խորհրդատուի ընտրության բաց մրցույթի արդյունքում շահել է Սաֆեժ /Ֆրանսիա/ և Էպտիսա /Իսպանիա/ կազմակերպությունների համատեղ ձեռնարկությունը, 6,098,700 ԱՄՆ դոլար (առանց հարկերի) պայմանագրային արժեքով։ Ծրագրի կառավարման խորհրդատուն, բացի շինարական աշխատանքների կատարման նկատմամբ վերահսկողությունից, կիրականացնի նաև ծրագրի ֆինանսական, գնումների, մոնիտորինգի և գնահատման գործառույթները։