Ոստիկանությունն արձագանքեց Ռուբեն Հայրապետյանի սպառնալիքներին

Օրեր առաջ «Նուվել դ’Արմենի Մագազին» ամսագրին տված հարցազրույցում Ռուբեն Հայրապետյանը սպառնացել  էր «Վահե Ավետյան» հասարակական շարժման նախաձեռնող խմբի անդամներ Գարեգին Չուգասզյանին, Հրանուշ Խառատյանին և «Պահանջում ենք պատժել Հարսնաքարի միջադեպի բոլոր մեղավորներին» քաղաքացիական նախաձեռնության անդամ Դավիթ Սանասարյանին. «Այ հիմա ահաբեկելը կտեսնեն: Իրենց ընտանիքներն իմ ձեռքը կրակն են ընկնելու: Իրենք բոլորը շաքարով հիվանդանալու են: Մինչև մահ վախենալու են ինձանից: Ես դա բացեիբաց ասելու եմ»։

Այս մասին Lurer.com-ը զրուցեց Ոստիկանության հասարակայնության հետ կապերի և լրատվության վարչության պետ Աշոտ Ահարոնյանի հետ.

«Վերը նշված հրապարակումների կապակցությամբ հայտնում ենք, որ.

1. Համաձայն ՀՀ Քր. օր.-ի 137-րդ հոդվածի 1-ին մասի՝ հանցագործություն է համարվում սպանության, առողջությանը ծանր վնաս պատճառելու կամ գույք ոչնչացնելու սպառնալիքը, եթե այդ սպառնալիքն իրականացնելու իրական վտանգ է եղել։

2.Համաձայն ՀՀ Քր. դատ. օր-ի 183-րդ հոդվածի 1-ին մասի` քրեական գործ հարուցվում է ոչ այլ կերպ, քան տուժողի բողոքի հիման վրա:

ՀՀ ոստիկանությունում վերը նշվածի վերաբերյալ բողոք չի ստացվել: Միաժամանակ հարկ ենք համարում  նշել, որ քրեական իրավունքի տեսանկյունից սպառնալիքը պետք է լինի կոնկրետ, իսկ այն իրականացնելու վտանգը՝ իրական, իսկ հանցակազմը բացակայում է բոլոր այն դեպքերում, երբ սպառնալիքները հնչեցվում են անորոշ, կոնֆլիկտի ընթացքում, զայրույթի պահին և չունեն կոնկրետ հասցեատեր»: