ԱՎԾ-ի թվերը համապատասխանո՞ւմ են իրականությանը. Վարդան Օսկանյան

Այսօր՝ սեպտեմբերի 12-ին, Վարդան Օսկանյանը հարց է ուղղել կառավարությանը՝ կապված ՀՀ ազգային վիճակագրական ծառայության կողմից տնտեսական ակտիվության վերաբերյալ հրապարակվող վիճակագրական թվերի՝ իրականաությանը համապատասխանելու վերաբերյալ: Նա նշել է, որ թվերը հուսադրող են, սակայն կասկածներ կան՝ որքանով են դրանք համապատասխանում իրականությանը: Նրա հարցը հնչել է հետևյալ կերպ. «Աղքատության թիվը չի նվազում, բյուջեն չի աճում, այդ դեպքում ինչո՞վ բացատրել նման մակրոտնտեսական անհավասարակշռությունը»:

ՀՀ ֆինանսների նախարար Վաչե Գաբրիելյանն իր հերթին ասել է, որ համաշխարհային տնտեսությունը վերականգնման փուլում է, սակայն դա տեղի է ունենում առանց աշխատատեղերի ստեղծման: Հայաստանում գոնե աշխատատեղեր ստեղծվում են, սակայն փոքր չափերով:

Այն հարցին, թե որքան կաճեն բյուջեի եկամուտները, եթե տնտեսական աճը նախատեսված 4,2%-ի համեմատ կազմի 5,5% (նկատի ունենալով, որ հարկային եկամուտների հավելաճը նախատեսվել է 101 մլրդ դրամի չափով), ՀՀ ֆինանսների նախարարը պատասխանել է՝ ասելով, որ 2012թ.-ի անվանական ՀՆԱ-ի շեղումը 2011թ.-ի անվանական ՀՆԱ-ից մեծ չի լինի, հետևաբար բյուջետային եկամուտների հավաքագրման մեծ տատանումներ չեն սպասվում: