Գումար՝ հրատապ հարցերի լուծման համար

Այսօր տեղի ունեցած կառավարության նիստի ժամանակ համաձայնություն է տրվել Երևան քաղաքի վարչական տարածքում գտնվող պետական սեփականություն համարվող անշարժ գույքի, իրավաբանական անձանց կանոնադրական կապիտալում պետական մասնակցության մասնավորեցմամբ Երևանի քաղաքապետարանի անվամբ բացված հատուկ հաշվում կուտակված միջոցների մնացորդից ավելի քան 125 մլն դրամի տրամադրման նախագիծը, որն ուղղվելու է Երևան քաղաքի Տիտոգրադյան փողոցի հիմնանորոգմանը:

Կառավարության որոշմամբ փոփոխություն է կատարվել նախկինում ընդունված որոշումներից մեկում, որը վերաբերում էր ռադիոհաճախականությունների կառավարման ոլորտին: Ակնկալվում է կանոնակարգել համակարգող հանձնաժողովի կողմից ռադիոհաճախականությունների որոշակի հատվածների առանձնացման վերաբերյալ պետական մարմինների հայտերի քննարկման գործընթացը:

Վերաբաշխում կատարելով 2012թ. պետբյուջեում, փոփոխություններ՝ իր ավելի վաղ ընդունած որոշումներից մեկում, կառավարությունը որոշել է ֆինանսավորել Երևանի Կ. Դեմիրճյանի անվան մետրոպոլիտենի ուղևորափոխադրման կանխատեսվող ցուցանիշի հետևանքով հնարավոր ճեղքվածքը՝ հատկացնելով 240 մլն դրամ:

Նիստում կառավարությունը ՀՀ ԿԱ ազգային անվտանգության ծառայության պետական պահպանության ծառայության պետին թույլատրել է 2012թ. բյուջետային տարվա արդյունքով տնտեսված 60 մլն դրամն ուղղել ՀՀ անկախության 21-րդ տարեդարձի կապակցությամբ զինծառայողների և վարձու աշխատակիցների պարգևավճարների տրամադրմանը։