Վերականգնման աշխատանքների արժեքը կազմել է շուրջ 160.89 մլն դրամ

2012թ սեպտեմբերի 7-ին շահագործման հանձնվեց ՀՀ պետական բյուջեի միջոցներով հիմնանորոգված Մ-17 - Նռնաձոր կմ 0+000–կմ 2+246 ճանապարհահատվածը: Գոյություն ունեցող ճանապարհահատվածն անցնում էր ժայռային բարդ տեղանքով և ուներ 2.5–3 մ լայնություն, որոշ տեղամասեր երթևեկության համար շատ վտանգավոր և դժվարանցանելի էին: Գոյություն ունեցող ճանապարհահատվածը չի ունեցել ջրահեռացման համակարգ, բացակայում էին անվտանգության տարրերը: Իրականացվել է մոտ 18500 խմ մերձճանապարհային հանույթ, որից 5800 խմ՝ ժայռային, ինչի արդյունքում ճանապարհահատվածը լայնացվել է, կառուցվել է նախագծով նախատեսված 6.6 մ լայնությամբ հողային պաստառ՝ ավազակոպճային ծածկով և ջրահեռացման համակարգ, տեղադրվել են անվտանգության տարրեր:

Վերականգնման աշխատանքների արժեքը կազմել է շուրջ 160.89 մլն դրամ։ Պատվիրատուն ՀՀ տրանսպորտի և կապի նախարարության «Տրանսպորտի ԾԻԳ» ՊՀ-ն է, կապալառուն՝ «Մեղրու ՃՇՇՁ» ՍՊԸ-ն։ ՀՀ տրանսպորտի և կապի նախարարի հրամանով վերականգնված ճանապարհահատվածն ընդունող հանձնաժողովում ընդգրկված էին նախարարության, Սյունիքի մարզի մարզպետարանի, «Տրանսպորտի ԾԻԳ» ՊՀ-ի և «Հայաստանի ավտոմոբիլային ճանապարհների տնօրինություն» ՊՈԱԿ-ի, ՀՀ քաղաքաշինության նախարարության աշխատակազմի քաղաքաշինական պետական տեսչության պատասխանատու աշխատակիցներ, նախախագծային և տեխնիկական հսկողության կազմակերպությունների ներկայացուցիչները և շահագրգիռ համայնքի ղեկավարը։