«Հյուսիս-hարավ ճանապարհային միջանցք» ծրագրի շինարարության պաշտոնական մեկնարկը տրվեց

Երեւան-Արարատ ճանապարհահատվածի շինարարական սկզբնամասում սեպտեմբերի 13-ին տեղի ունեցավ «Հյուսիս-hարավ ճանապարհային միջանցք» ծրագրի շինարարության պաշտոնական մեկնարկը, որին մասնակցում էին ՀՀ տրանսպորտի եւ կապի նախարար Գագիկ Բեգլարյանը, «Հյուսիս-հարավ ճանապարհային միջանցքի ներդրումային ծրագրի իրականացման կազմակերպություն» ՊՈԱԿ-ի գլխավոր գործադիր տնօրեն Արա Հովսեփյանը, ՀՀ կառավարության եւ տեղական ինքնակառավարման մարմինների պաշտոնատար անձինք, շինարարական աշխատանքներն իրականացնող կազմակերպությունների պատասխանատուներ, Ասիական զարգացման բանկի ներկայացուցիչներ: Ներկա էր նաեւ շինարարությունն իրականացնող իսպանական «Իզոլյուքս Կորսան» ընկերության նախագահ Ֆրանսիսկո Գարսիան:

Ծրագրի իրականացման համար ՀՀ կառավարության եւ ԱԶԲ միջեւ 2009 թ.-ի սեպտեմբերի 15-ին կնքվել է Շրջանակային համաձայնագիր, որով նախատեսվում է 962 մլն ԱՄՆ դոլարի ֆինանսավորում /ԱԶԲ մասը կազմում է 500 մլն ԱՄՆ դոլար/: Ծրագիրը տրոհված է առանձին տրանշների, եւ այսօր ազդարարվել է ծրագրի շինարարական աշխատանքների սկիզբը: Այն նախատեսում է Երեւան-Արտաշատ շուրջ 20 կմ հատվածի լայնացում՝ միջին բաժանարար գոտու հաշվին մինչեւ 8 մ, ինչպես նաեւ ճանապարհի ասֆալտածածկի փոխարինում բետոնայինով: Ճանապարհի ծածկի փոխարինում նախատեսված է նաեւ Երեւան-Աշտարակ մայրուղու մոտ 11.5 կմ հատվածում, այնուհետեւ Աշտարակ-Թալին 42 կմ հատվածի լայնացում՝ երկու երթեւեկելի գոտուց մինչեւ քառուղի: Աշխատանքների ժամանակացույցով նախատեսված է 18 ամիս՝ Երեւան-Արարատ, 18 ամիս՝ Երեւան- Աշտարակ, 36 ամիս՝ Աշտարակ-Թալին հատվածների շինարարության համար: ՀՀ կառավարության հաստատմանն է ներկայացվել նաեւ Հյուսիս-հարավ ճանապարհային ծրագրի Աշտարակ-Թալին հատվածի Հողերի օտարման եւ տարաբնակեցման ծրագիրը /ՀՕՏԾ/: Այն ենթադրում է շուրջ 850 միավոր հողատարածքների եւ շինությունների իրացում, ընդհանուր առմամբ մոտ 2.3 մլրդ դրամի չափով: Տրանսպորտի եւ կապի նախարարությունը պատրաստվում է անմիջապես անցնել ՀՕՏԾ իրականացմանը՝ Աշտարակի եւ Թալինի տարածաշրջաններում: Մինչեւ տարեվերջ նախապատրաստվում է մրցույթի հայտարարում նաեւ Թալին-Գյումրի հատվածի համար, որի նախագծանախահաշվային փաստաթղթերն ամբողջովին պատրաստ են: Ծրագրի ճարտարագիտական եւ տեխնիկական վերահսկող ընկերությունն է ֆրանսիական «Սաֆեժ»-ը:

Նախարար Գագիկ Բեգլարյանը լրագրողների հետ զրույցում նշել է, որ «Հյուսիս-հարավ» մայրուղու շինարարությունն ունի խոշոր պետական եւ տարածաշրջանային մեծ նշանակություն: «Ճանապարհաշինական այս ծրագիրը խոշորագույններից մեկն է մեր անկախ Հանրապետության պատմության մեջ: Այն հյուսիսից Հայաստանը կապելու է դեպի Սեւ ծով տանող միջպետական ճանապարհներին, հարավից միանալու է դեպի Ասիական տնտեսական եւ առեւտրային կենտրոններ ձգվող մայրուղիներին: Մենք մանրամասն աշխատել ենք շինարարների հետ, նախագծերը արված են շատ լավ, եւ մինչ տարեվերջ բավականին մեծ աշխատանքներ կկատարվեն Երեւան-Աշտարակ, Երեւան-Արտաշատ ճանապարհներին: Արդյունքում, մինչեւ 2016թ., կունենանք միջազգային կարգի բետոնանածածկ արագընթաց մայրուղի Արտաշատ-Երեւան-Գյումրի հատվածում: Իսպանական «Իզոլյուքս Կորսան» շինարարական կազմակերպությունն ունի բոլոր տվյալները՝ սահմանված ժամկետում աշխատանքներն ավարտելու համար»,-նշել է նախարարը: Գագիկ Բեգլարյանը շեշտել է, որ ՀՀ նախագահ Սերժ Սարգսյանի պահանջով շինարարական աշխատանքների ընթացքում օգտագործվելու է հայկական արտադրության հումք, արտասահմանից բերվելու են միայն նորագույն տեխնիկաները, որոնք Հայաստանը մինչ օրս չի ունեցել: Նախարարը նաեւ կարեւորել է, որ ծրագրի շրջանակներում բացվում են հազարից ավելի աշխատատեղեր, իսկ ճանապարհի կառուցումից հետո վարորդները մի քանի անգամ ավելի արագ կհասնեն նախատեսված վայր:

Հանդիսավոր միջոցառման բացման խոսքում «Հյուսիս-հարավ ճանապարհային միջանցքի ներդրումային ծրագրի իրականացման կազմակերպություն» ՊՈԱԿ-ի գլխավոր գործադիր տնօրեն Արա Հովսեփյանը նշել է, որ այս ավտոմոբիլային միջանցքի կառուցումն ունի խոշոր ռազմավարական նշանակություն: Այն թույլ կտա Հայաստանն առավել կարճ ճանապարհով կապել տարածաշրջանային մոտակա նավահանգիստների հետ:

Արա Հովսեփյանը նախարար Գագիկ Բեգլարյանին, հյուրերին ներկայացրել է ճանապարհահատվածի շինարարության ընթացքին եւ տեխնիկական հարցերին վերաբերող տվյալներ, որին հաջորդել է ճանապարհահատվածի շինարարության սկիզբը խորհրդանշող հիմնաքարի տեղադրման հանդիսավոր արարողությունը:Հիմնաքարը տեղադրել են նախարար Գագիկ Բեգլարյանը և «Իզոլյուքս Կորսան» շինարարական ընկերության նախագահ Ֆրանսիսկո Գարսիան:

Գագիկ Բեգլարյանն այցելել է նաեւ Աշտարակ քաղաք, որտեղ մասնակցել է «Իզոլյուքս Կորսան» շինարարական ընկերության եւ «Սաֆեժ» ինժեներական ընկերության համատեղ գլխամասային գրասենյակի հանդիսավոր բացման արարողությանը:

Գագիկ Բեգլարյանը,Արա Հովսեփյանը «Իզոլյուքս Կորսան» շինարարական ընկերության նախագահ Ֆրանսիսկո Գարսիան, «Սաֆեժ» ընկերության ծրագրերի ղեկավար Նիկոլաս Ժենիլսեն շրջել են գրասենյակում, ծանոթացել գրասենյակի տեխնիկական հնարավորություններին: