Անօրեն լրատվամիջոցը. Գլխավոր դատախազություն

««Հայկական ժամանակ» օրաթերթը, խախտելով ՀՀ օրենսդրության պահանջները, զբաղված է ակնհայտ զրպարտչական տեղեկություններ տարածելով»,– ասված է ՀՀ գլխավոր դատախազության պաշտոնական կայքում զետեղված հաղորդագրության մեջ: Դրանում ասված է հետևյալը. «Մասնավորապես՝ տվյալ թերթը 2012 թվականի սեպտեմբերի 13-ի թիվ 156 համարում տպագրել է, թե ՀՀ գլխավոր դատախազը չի կատարել «Դատախազության մասին» ՀՀ օրենքի պահանջը, ըստ որի՝ ամեն տարի ԱԺ պետք է ներկայացնի ՀՀ դատախազության 2011 թվականի գործունեության մասին հաշվետվությունը, ինչն ուղղակի սուտ է:

Ի գիտություն «Հայկական ժամանակի»՝ տեղեկացնում ենք, որ 2007 թվականին ընդունված «Դատախազության մասին» ՀՀ օրենքի 5-րդ հոդվածի համաձայն՝ Գլխավոր դատախազը յուրաքանչյուր տարի Հայաստանի Հանրապետության Ազգային ժողով (այսուհետ՝ Ազգային ժողով) և Հանրապետության նախագահին է ներկայացնում դատախազության նախորդ տարվա գործունեության մասին հաղորդում: Եւ ի կատարումն օրենքի պահանջի՝ յուրաքանչյուր տարի ներկայացվել է գրավոր հաղորդում՝ ՀՀ նախագահին եւ ԱԺ-ին: 2011 թվականի գործունեության մասին հաղորդումը ՀՀ գլխավոր դատախազը ՀՀ նախագահին եւ ԱԺ-ի նախագահին է ներկայացրել 2012 թվականի մարտի 29-ին (ելքի համար N20/10-163-12)՝ ծառայական փոստով՝ ՀՀ ԱԱԾ-ի սուրհանդակային կապի վարչության միջոցով:

Օրենքը չի նախատեսում, որ տվյալ հաղորդումները պետք է տեղադրվեն դատախազության ինտերնետային էջում, հետեւաբար դրանք հրապարակելու պարտավորություն դատախազությունը չունի:

ԱԺ-ին հաղորդում չներկայացնելու մասին «Հայկական ժամանակի»՝ սեպտեմբերի 13-ին տարածած լուրը ակնհայտ սուտ է եւ զրպարտություն: ՀՀ քաղաքացիական օրենսգրքի 1087 պրիմ հոդվածի համաձայն, զրպարտություն է համարվում անձի վերաբերյալ այնպիսի փաստացի տվյալներ (statement of fact) հրապարակային ներկայացնելը, որոնք չեն համապատասխանում իրականությանը և արատավորում են նրա պատիվը, արժանապատվությունը կամ գործարար համբավը: Ավելին, թերթը ողջամտության սահմաններում միջոցներ չի ձեռնարկել՝ պարզելու դրանց ճշմարտությունը և հիմնավորվածությունը: Համենայն դեպս՝ ՀՀ դատախազությունը «լուրի» իսկությունը ճշտելու վերաբերյալ որեւէ հարցում՝ բանավոր կամ գրավոր, տվյալ թերթից չի ստացել: Եվ հրապարակային ներկայացվել են իրականությանը չհամապատասխանող տեղեկություններ, ինչն արդեն լրագրողական օրինական գործունեության հետ որեւէ աղերս չունի»: