ՀՀ գյուղատնտեսության նախարարն ընդունել է ՊԳԿ-ի պատվիրակությանը

Այսօր ՀՀ գյուղատնտեսության նախարար Սերգո Կարապետյանն ընդունել է Հայաստանում ՄԱԿ-ի պարենի և գյոււղատնտեսության կազմակերպության կողմից իրականացված աշխատանքների գնահատման պատվիրակության մի խումբ անդամների՝ Մեթյու Քահանեի գլխավորությամբ: Ողջունելով հյուրերին՝ նախարարը գոհունակություն է հայտնել ՊԳԿ-ի կողմից իրականացվող աշխատանքների վերաբերյալ՝ ընգծելով վերջիններիս առանձնահատուկ դերն ու նշանակությունը ՀՀ գյուղատնտեսության զարգացման համար: «Այստեղ կուտակված փորձը մեզ հուշում է, որ առանձին դեպքերում աշխատակարգերի պարզեցման պայմաններում հնարավոր է հասնել ավելի մեծ արդյունքների»,-նշել է նա:

Շնորհակալություն հայտնելով ընդունելության և գնահատող խմբի աշխատանքներին աջակցելու համար, պարոն Քահանեն տեղեկացրել է, որ խմբի անդամները Հայաստանում ունեցել են շուրջ 100 հանդիպումներ, ուսումնասիրել 16 ծրագրեր, այցելել մարզեր՝ տեղում կատարված աշխատանքներին ծանոթանալու համար:

Անցած տարիներին իրականացված ծրագրերը դրական և արդյունավետ գնահատելով՝ պարոն Քահանեն նշել է, որ դրանք հիմնականում նպատակ են հետապնդել բարելավելու գյուղատնտեսական կենդանիների առողջության, կենսաբազմազանության, անտառային տնտեսության, բույսերի պաշտապանության և գենետիկական ռեսուրսների պահպանության ոլորտների գործունեությունը: Առանձնապես արդյունավետ և ժամանակին իրականացված ծրագրեր համարվեցին խոզերի աֆրիկյան ժանտախտի և մորեխների դեմ պայքարի ծրագրերը:

Այդ ընթացքում, ըստ պարոն Քահանեի, Հայաստանում ավելացել են ՊԳԿ ծրագրերի իրականացմանը մասնակցող հայ փորձագետները: Ձեռք բերված դրական արդյունքներին նպաստել է նաև ՊԳԿ- ի հայաստանյան գրասենյակի նպատակասլաց աշխատանքը:

Հանդիպման ավարտին նախարար Սերգո Կարապետյանը կրկին շնորհակալություն է հայտնել խմբի անդամներին՝ իրականացված կարևոր աշխատանքների համար, և հույս հայտնել, որ ՊԳԿ-ՀՀ գյուղնախարարություն հարաբերությունները կկրեն շարունակական բնույթ: